తీగజాతి కూరగాయల తెగుళ్ల నివారణకు కేవీకే బెల్లంపల్లి శాస్త్రవేత్త సూచనలు

మంచిర్యాల జిల్లా బెల్లంపల్లి కృషి విజ్ఞాన కేంద్రం (KVK) శాస్త్రవేత్త శ్రవంతి తీగజాతి కూరగాయల్లో వచ్చే తెగుళ్ల నివారణపై రైతులకు సూచనలిచ్చారు. వర్షాకాలంలో బీర, సోర, కాకర, దొండ, పొట్ల వంటి పంటల్లో పలు తెగుళ్లు ఆశించే ప్రమాదం ఉందని, ముందస్తు చర్యలు తప్పనిసరి అని స్పష్టం చేశారు.

ముందుగా తెగుళ్ల రాకను తగ్గించడానికి దుక్కి దున్నేటప్పుడు ఎకరానికి 250 కిలోల వేపపిండి వేయాలని, ప్రతి మొక్క మొదట్లో ట్రైకోడర్మా కల్చర్ ఉంచాలని సిఫారసు చేశారు. ఆకులపై తెల్లటి పొడిలా కనిపించే బూడిద తెగులు నివారణకు డైనోక్యాప్ (1 ml/L) పిచికారీ చేయాలి. చల్లని, మబ్బు వాతావరణంలో వచ్చే బూజు తెగులును మ్యాంకోజెబ్ (2.5 g/L) లేదా మెటలాక్సిల్ తో అదుపు చేయవచ్చు.

ఆకస్మికంగా మొక్కలు ఎండిపోయే ఫ్యూజరియం వేరుకుళ్ల తెగులు ఉన్నప్పుడు కాపర్ ఆక్సిక్లోరైడ్ (3 g/L) ద్రావణాన్ని 10 రోజుల వ్యవధిలో రెండు మూడు సార్లు పిచికారీ చేయాలి. ఆకులు పసుపు రంగులోకి మారి, కాండం వద్ద జిగురు కనిపించే బంక తెగులుకు కార్బెండజిమ్, మెటలాక్సిల్ లేదా అజాక్సిస్ట్రోబిన్ వాడాలి. ఈ తెగులుకు కూడా ట్రైకోడర్మా వాడాలని సూచించారు.

పేనుబంక వల్ల వచ్చే వెర్రి తెగులు (లీఫ్ కర్ల్) నివారణకు ఇమిడాక్లోప్రిడ్ (0.3 ml/L) లేదా ఆసిటమిప్రిడ్ పిచికారీ చేయాలి. పిందెలు రాలిపోయి, వాటిపై మచ్చలు ఏర్పడే పక్షి కన్ను తెగులుకు ప్రొపికోనజోల్ లేదా కార్బెండజిమ్ వాడాలని శ్రవంతి వివరించారు.