లాల్ దర్వాజా బోనాల ఉత్సవాలకు ఏర్పాట్లు పూర్తి; భక్తులకు వైద్య, భద్రత సౌకర్యాలు

హైదరాబాద్‌లోని లాల్ దర్వాజా సింహవాహిని అమ్మవారి ఆలయంలో ఆషాఢ మాస బోనాల ఉత్సవాలు జరగనున్నాయి. ఈ నెల 9న బలిగంప కార్యక్రమం, 10వ తేదీన అంబారీపై అమ్మవారి ఊరేగింపు ఉంటుందని అధికారులు తెలిపారు.

ఎండోమెంట్ కమిషనర్ హనుమంతరావు మాట్లాడుతూ భక్తుల సౌకర్యాలకు ప్రత్యేక ఏర్పాట్లు చేసినట్లు వివరించారు. దేవాదాయ శాఖ మంత్రి కొండ సురేఖ, జిల్లా ఇన్‌ఛార్జి మంత్రి పొన్నం ప్రభాకర్ నేతృత్వంలో ఏడుగురు సభ్యుల ఫెస్టివల్ కమిటీ ఏర్పాటు చేశారు. ముఖ్యమంత్రి రేవంత్ రెడ్డి భక్తులకు ఎటువంటి అసౌకర్యం కలగకుండా చూడాలని ఆదేశించినట్లు ఆయన తెలిపారు.

పోలీస్, జీహెచ్‌ఎంసీ, హెచ్‌ఎండబ్ల్యూఎస్‌బీ, దేవాదాయ శాఖ, ఇతర విభాగాలు సంయుక్తంగా ఏర్పాట్లు చేస్తున్నాయి. సికింద్రాబాద్ బోనాల ఉత్సవాల్లో ఎదురైన అనుభవాలతో లాల్ దర్వాజాలో భారీగా జనం వస్తారని అంచనా వేసి ముందస్తు చర్యలు తీసుకున్నట్లు కమిషనర్ చెప్పారు.

వైద్యం కోసం అడ్వాన్స్డ్ లైఫ్ సపోర్ట్ అంబులెన్సులు, ప్రాథమిక ఆరోగ్య కేంద్రాలు ఏర్పాటు చేశారు. అత్యవసర పరిస్థితిలో గ్రీన్ ఛానల్ ద్వారా రోగులను తరలిస్తామని, తాగునీటి క్యాంప్‌లు, ఇతర సౌకర్యాలు కూడా అందుబాటులో ఉంటాయని తెలిపారు. జోగినీల కోసం రెండు రోజుల క్రితమే ప్రత్యేక దర్శనాలు ఇప్పించామని, ఇంకా వచ్చేవారు ముందస్తు సమాచారం ఇవ్వాలని కమిషనర్ సూచించారు.