IPL స్థాపకుడు లలిత్ మోదీ: ‘దావూద్ నుండి ఫోన్ కాల్ వచ్చింది, కొడుకును కిడ్నాప్ చేశారు’

ఐపీఎల్ సృష్టికర్త లలిత్ మోదీ తొలిసారిగా ఒక ఇంటర్వ్యూలో తనపై దావూద్ ఇబ్రహీం ముఠా నుండి వరుస బెదిరింపులు, హత్యాయత్నాలు జరిగాయని, తన కొడుకు లండన్‌లో కిడ్నాప్ అయ్యాడని వెల్లడించారు. ముంబై పోలీసులు తనకు జెడ్ సెక్యూరిటీ కల్పించారని, ముంబైలోని తన ఇంటి బయట కాల్పులు జరిగాయని ఆయన చెప్పారు. దక్షిణాఫ్రికాలోని జోహన్నెస్‌బర్గ్‌లో, మోంటెనెగ్రోలో కూడా తనను హతమార్చేందుకు ప్రయత్నాలు జరిగాయని, వీటిని సంబంధిత ప్రభుత్వాలు అడ్డుకున్నాయని వివరించారు.

అయితే అత్యంత భయంకరమైన ఘటన లండన్‌లో చోటుచేసుకుందని మోదీ తెలిపారు. ‘స్లోన్ స్ట్రీట్‌లో నా కొడుకును కిడ్నాప్ చేశారు. ముగ్లీ ఆజం, బాబా అయీం అనే వ్యక్తులు దీని వెనుక ఉన్నారు. ఇది ఊహ కాదు, నిజం’ అని ఆయన పేర్కొన్నారు.

ఈ సంఘటనలన్నింటినీ దావూద్ ఇబ్రహీంతోనే ముడిపెట్టారు మోదీ. ఓ రోజు తెల్లవారుజామున 3:30 గంటలకు తనకు ఒక ఫిక్సర్ నుంచి ఫోన్ వచ్చిందని, ఆయన తనను బాబా అనే వ్యక్తి పెంట్‌హౌస్‌కు తీసుకెళ్లాడని చెప్పారు. ‘బాబా నేరుగా టెరైట్ ఫోన్‌లో దావూద్‌కు ఫోన్ చేశాడు. నేను భయంతో... నిజంగానే భయపడ్డాను. అప్పుడు దావూద్‌తో మాట్లాడాల్సి వచ్చింది’ అని మోదీ వివరించారు. ఈ సంఘటన తర్వాత తన సమస్యలు తీరిపోయాయని భావించానని ఆయన అన్నారు.

ముంబై పోలీసులు గతంలోనే ముఠా సంభాషణలను రికార్డ్ చేసి తనకు జెడ్ భద్రత కల్పించారని, ఈ విషయాన్ని తాను ఎవరికీ చెప్పలేదని మోదీ తెలిపారు. దావూద్ ఇబ్రహీం భారతదేశ అత్యంత వాంటెడ్ నేరస్తుడు, ఉగ్రవాది. లలిత్ మోదీ గతంలో ఐపీఎల్‌ను స్థాపించి, ఆర్థిక అక్రమాల ఆరోపణలతో దేశం విడిచి లండన్‌లో ఉంటున్నారు.