భూ వినియోగ మార్పిడి అనుమతుల సరళీకరణ: ముసాయిదా నోటిఫికేషన్ తర్వాత రెండు నెలలైనా తుది జీఓ లేదు

రాష్ట్రంలో భూ వినియోగ మార్పిడి అనుమతులను సరళీకృతం చేసే ప్రభుత్వ ప్రతిపాదనలు ఇంకా అమలుకు రాలేదు. ముసాయిదా నోటిఫికేషన్ విడుదలై రెండు నెలలు గడిచినా తుది ఉత్తర్వులు జారీ కాలేదు.

ప్రస్తుతం రాష్ట్రంలో పట్టణాభివృద్ధి సంస్థలు రెండు హెక్టార్ల వరకు మాత్రమే భూ వినియోగ మార్పిడి అనుమతులు ఇస్తున్నాయి. అంతకుమించి విస్తీర్ణం ఉన్న లేఔట్లకు ప్రభుత్వ ఆమోదం తప్పనిసరి.

సరళీకరణపై ప్రభుత్వం రూపొందించిన ముసాయిదాలో CRDA, విశాఖపట్నం, తిరుపతి పట్టణాభివృద్ధి సంస్థలకు 10 హెక్టార్ల వరకు, ఇతర పట్టణాభివృద్ధి సంస్థలు, పురపాలికలు, నగర పంచాయతీలకు 4 హెక్టార్ల వరకు స్థానికంగా అనుమతులు ఇచ్చే అధికారం ఇవ్వాలని ప్రతిపాదించింది.

ఏప్రిల్ 26న విడుదలైన ఈ ముసాయిదాపై ప్రజల నుంచి అభిప్రాయాలు, అభ్యంతరాలు స్వీకరించారు. సాధారణంగా నెల రోజుల్లో తుది నిర్ణయం తీసుకోవాల్సి ఉన్నా ఇప్పటివరకు ఎలాంటి ఉత్తర్వులు వెలువడలేదు. కొత్త విధానం అమల్లోకి వస్తే అనుమతుల ప్రక్రియ వేగవంతం అవుతుందని, ప్రభుత్వ స్థాయిలో ఆమోదం కోసం ఎదురుచూపులు తగ్గుతాయని రియల్ ఎస్టేట్ రంగం భావిస్తోంది.