లింగంపల్లిలో 3 ఏళ్ల బాలిక కిడ్నాప్; గంటల్లోనే రక్షించి, అక్రమ దత్తత ముఠా గుట్టు రట్టు

హైదరాబాద్‌లోని లింగంపల్లి రైల్వే స్టేషన్ వద్ద ఫుట్‌పాత్‌పై నిద్రిస్తున్న మూడేళ్ల బాలికను అపహరించారు. తల్లి ఫిర్యాదుతో దర్యాప్తు ప్రారంభించిన పోలీసులు కొద్ది గంటల్లోనే బాలికను రక్షించారు. ఈ కేసులో అక్రమ దత్తతల ముఠా గుట్టు బట్టబయలైంది.

అనంతపురం జిల్లా గుంతకల్లుకు చెందిన గోవిందమ్మ, బతుకుదెరువు కోసం హైదరాబాద్ వచ్చి లింగంపల్లిలో వీధి వ్యాపారం చేస్తోంది. ఈ నెల 15న రాత్రి తన కుమార్తె కనిపించకపోవడంతో పోలీసులను ఆశ్రయించింది. సైబరాబాద్ పోలీసులు కేసు నమోదు చేసి దర్యాప్తు ప్రారంభించారు.

రైల్వే స్టేషన్ చుట్టూ ఉన్న సీసీటీవీ ఫుటేజీ, మొబైల్ సిగ్నల్స్ ఆధారంగా నిందితుల కదలికలను గుర్తించారు. మహబూబ్‌నగర్‌లోని ఓ ప్రైవేట్ డయాగ్నొస్టిక్ ల్యాబ్‌లో స్టాఫ్ నర్స్, ల్యాబ్ టెక్నీషియన్‌గా పనిచేస్తున్న నవనీత ఈ అపహరణకు సూత్రధారిగా తేలిందని పోలీస్ కమిషనర్ రమేష్ రెడ్డి తెలిపారు.

రాణి అనే మహిళ అక్రమ దత్తత ద్వారా బిడ్డ కావాలని నవనీతను సంప్రదించింది. నవనీత, వికారాబాద్ జిల్లా పరిగి గ్రామానికి చెందిన శ్రీనివాస్‌ను సంప్రదించగా, అతడు లింగంపల్లిలో ఫుట్‌పాత్‌పై నిద్రిస్తున్న బాలికను ఎత్తుకెళ్ళాడు. శ్రీనివాస్‌కు సహకరించిన ముగ్గురిని కూడా పోలీసులు అరెస్ట్ చేశారు.

ఇదే తరహాలో 15 రోజుల క్రితం పశ్చిమ బెంగాల్‌కు చెందిన ఓ జంట, పిల్లలను అక్రమంగా కొనుగోలు చేయడానికి ప్రయత్నించారని పోలీసులు గుర్తించారు. అప్పుడు మూడేళ్ల బాలికను రూ.1.5 లక్షలకు బేరం కుదిరినా, ఆ బిడ్డ తల్లిని గుర్తుపడుతుందన్న అనుమానంతో కొనుగోలుదారు వెనక్కి తగ్గారని సీపీ వివరించారు.

ప్రస్తుతం బాలిక సురక్షితంగా తల్లి వద్ద చేరింది. ఈ అక్రమ దత్తత, పిల్లల అపహరణ నెట్‌వర్క్‌లో ఇంకా ఎవరెవరు ఉన్నారు, ఆర్థిక లావాదేవీలు ఎలా జరిగాయనే కోణంలో పోలీసులు దర్యాప్తు కొనసాగిస్తున్నారు.