గుంటూరులో లిక్విడ్ గంజాయి స్వాధీనం: ముగ్గురు యువకులు అరెస్ట్

గుంటూరు: లాలాపేట పోలీసులు లిక్విడ్ గంజాయి అక్రమ రవాణా కేసులో ముగ్గురు యువకులను అరెస్ట్ చేశారు. ఈ నెల 26వ తేదీ అర్ధరాత్రి ఐపీడీ కాలనీలో వాహన తనిఖీల్లో ఈ ఘటన వెలుగులోకి వచ్చింది.

ఈస్ట్ సబ్ డివిజన్ డీఎస్పీ శ్రీనివాసరెడ్డి తెలిపిన వివరాల ప్రకారం, లాలాపేట ఎస్సై వెంకట్రావు ఆధ్వర్యంలో జరిపిన తనిఖీలో ఒక మహీంద్రా వాహనాన్ని (AP05 EP 8687) అడ్డగించి సోదా చేశారు. అందులో 2 కిలోల 110 గ్రాముల లిక్విడ్ గంజాయి, మూడు ప్లాస్టిక్ కంటైనర్లలో నింపిన లిక్విడ్ గంజాయి, 20 ఖాళీ కంటైనర్లు, గంజాయి సిగరెట్ తయారీ రోలింగ్ పేపర్లు స్వాధీనం చేసుకున్నారు.

అరెస్ట్ అయిన యువకులు రామశెట్టి మహావీర్, అతని స్నేహితులు అబ్బుసాయి, మణికంట తేజ, షేక్ రహ్మతుల్లా. వీరంతా ఐపీడీ కాలనీ నివాసితులు. రామశెట్టి మంగళగిరిలో బీటెక్ చదువుతున్నాడని పోలీసులు వెల్లడించారు.

దర్యాప్తులో నిందితులు ఏపీ-ఒడిశా సరిహద్దు ప్రాంతాల నుంచి లిక్విడ్ గంజాయిని కొనుగోలు చేసి, గుంటూరులో చిన్న చిన్న ప్యాకెట్లుగా తయారు చేసి అధిక ధరలకు అమ్ముతున్నట్లు తేలింది. పోలీసులు కేసు నమోదు చేసి మిగతా నిందితుల కోసం గాలింపు చేస్తున్నారు.