స్మార్ట్ కిచెన్ల పేరిట మధ్యాహ్న భోజన కార్మికుల తొలగింపు లేదు: మంత్రి లోకేష్

ప్రభుత్వ పాఠశాలల్లో స్మార్ట్ కిచెన్ల ప్రవేశపెడతారని, దీనివల్ల మధ్యాహ్న భోజన పథకం కార్మికుల ఉద్యోగాలు ఊడతాయని కొందరు చేస్తున్న ప్రచారం అవాస్తవమని ఏపీ మంత్రి నారా లోకేష్ స్పష్టం చేశారు. స్మార్ట్ కిచెన్ల కారణంగా ఒక్క కార్మికుడిని కూడా తొలగించలేదన్నారు.

దశాబ్దాలుగా పాఠశాలల్లో సేవలందిస్తున్న సుమారు 85 వేల మంది వంట కార్మికులను ప్రభుత్వం పూర్తిగా ఆదరిస్తోందని, వారి జీవనోపాధికి ఎలాంటి ముప్పు లేదని మంత్రి వివరించారు. మధ్యాహ్న భోజన కార్మికుల గౌరవ వేతనాలు ఏప్రిల్ నెల వరకు చెల్లించామని, సాంకేతిక కారణాల వల్ల నిలిచిపోయిన స్వల్ప బకాయిలను విడుదల చేసేందుకు ఏర్పాట్లు జరిగాయని తెలిపారు.

గత ప్రభుత్వం పెండింగ్‌లో ఉంచిన సుమారు 350 కోట్ల రూపాయల బకాయిలను కూటమి ప్రభుత్వం విడుదల చేసిందని లోకేష్ చెప్పారు. ఆయాలు, నైట్ వాచ్‌మెన్ వేతనాలతో పాటు విద్యార్థులకు అందించే గుడ్లు, చిక్కీలు, శానిటరీ నాప్‌కిన్ల కొనుగోలుకు సంబంధించి కూడా చాలాకాలంగా చెల్లించాల్సిన బకాయిలు ఉన్నాయని ఆయన వివరించారు.

స్మార్ట్ కిచెన్ల వల్ల కార్మికుల ఉద్యోగాలు దెబ్బతీస్తాయన్నది రాజకీయ స్వార్థంతో చేస్తున్న దుష్ప్రచారమని ప్రభుత్వం పేర్కొంది. ఈ వ్యాఖ్యలపై ప్రతిపక్షాల స్పందన తెలియాల్సి ఉంది.