పవన్ కల్యాణ్‌పై టీపీసీసీ అధ్యక్షుడు మహేశ్ గౌడ్ విమర్శలు

టీపీసీసీ అధ్యక్షుడు మహేశ్ కుమార్ గౌడ్, ఏపీ డిప్యూటీ ముఖ్యమంత్రి పవన్ కల్యాణ్‌పై విమర్శలు చేశారు. పవన్ కల్యాణ్‌ను బీజేపీ ఆడిస్తున్న ‘తోలుబొమ్మ’ అని, పదేపదే తెలంగాణను కించపరిచేలా మాట్లాడుతున్నారని ఆయన అన్నారు. ఇది సినిమా కాదని, ఆ విషయాన్ని పవన్ గుర్తుంచుకోవాలని హెచ్చరించారు.

కాంగ్రెస్ పార్టీ ఆంధ్రప్రదేశ్ రాష్ట్ర విభజన సమయంలో తీసుకున్న నిర్ణయాల వల్ల అసంతృప్తి నెలకొన్నా, ఇప్పటికీ రెండు తెలుగు రాష్ట్రాలు అన్నదమ్ములుగా కలిసి అభివృద్ధి చెందాలని కాంగ్రెస్ కోరుకుంటోందని ఆయన స్పష్టం చేశారు. రాజకీయ లాభాల కోసం ఇరు రాష్ట్రాల మధ్య అగాధం పెంచే వారిని తెలంగాణ ప్రజలు ఆదరించరని హెచ్చరించారు.

తెలంగాణ రాజకీయాల్లో కాంగ్రెస్ పార్టీకి మినహా మరే పార్టీకి భవిష్యత్తు లేదని, పవన్ కల్యాణ్‌కు ఇక్కడ ఏమీ రాదని వ్యాఖ్యానించారు. ఈ విమర్శలపై పవన్ కల్యాణ్ లేదా జనసేన పార్టీ స్పందన తెలియాల్సి ఉంది.