మొక్కజొన్న పైరుకు ప్రస్తుతం పాటించాల్సిన యాజమాన్య సూచనలు

వరి, పత్తి తర్వాత అత్యధికంగా సాగు చేసే ఖరీఫ్ పంట మొక్కజొన్న. ఈ ఏడాది సకాలంలో వర్షాలు పడటంతో రైతులు సకాలంలోనే విత్తారు. ప్రస్తుతం పైరు 25 నుంచి 40 రోజుల దశలో ఉంది. ఈ దశలో సరైన యాజమాన్య పద్ధతులు పాటిస్తే అధిక దిగుబడి సాధించవచ్చు.

30-35 రోజుల దశలో ఉన్న పైరుకు ఎకరాకు 40-50 కిలోల యూరియాను టాప్ డ్రెస్సింగ్ గా వేయాలి. ఎరువు వేసిన వెంటనే అంతర కృషి చేస్తే ఎరువు మట్టిలో కలిసిపోయి వేళ్లకు అందుతుంది. అంతర కృషి వల్ల మట్టి గుల్లబడి మొక్కలు దృఢంగా పెరుగుతాయి, పడిపోకుండా నిలుస్తాయి.

50-55 రోజుల దశలో మరోసారి 40-50 కిలోల యూరియాతో పాటు 15-20 కిలోల మ్యూరేట్ ఆఫ్ పొటాష్ (MOP) వేయాలి. ఎరువులు వేసేటప్పుడు భూమిలో తగినంత తేమ ఉండేలా చూడాలి. వర్షాలు అనుకూలంగా లేక నీటి ఎద్దడి ఉన్న ప్రాంతాల్లో టాప్ డ్రెస్సింగ్ సిఫార్సు కాదు. అప్పుడు మొక్కలు వేళ్ల ద్వారా పోషకాలు గ్రహించలేని స్థితిలో ఉంటాయి. కాబట్టి ఆకుల ద్వారా పోషకాలు అందించాలి. లీటర్ నీటికి 20 గ్రాముల యూరియా కలిపి పిచికారీ చేస్తే తాత్కాలిక ఉపశమనం లభిస్తుంది. ఆ తర్వాత 19:19:19 ఎన్పీకే 10 గ్రాములు లీటర్ నీటికి కలిపి పిచికారీ చేస్తే భాస్వరం లోపం నివారించవచ్చు.

కలుపు నివారణకు విత్తిన నెల రోజులకు అంతర కృషి సాధ్యం కాకపోతే, విశాల ఆకు కలుపు మొక్కలు ఎక్కువగా ఉంటే ఎకరాకు 500 గ్రాముల 2,4-డి సోడియం సాల్ట్ ను 200 లీటర్ల నీటిలో కలిపి చాళ్లలో పిచికారీ చేయాలి. మొక్కల మధ్య ఉన్న కలుపును కూలీలతో తీయించాలి.

నీటి యాజమాన్యంలో పూత దశ, గింజ పాలు పోసుకునే దశ చాలా కీలకం. విత్తిన 30-35 రోజులకు పూత వస్తుంది. పూత వచ్చిన 15 రోజుల తర్వాత గింజలు నిండుకుంటాయి. ఈ రెండు దశల్లో తప్పకుండా నీటి తడి ఇవ్వాలి. దీర్ఘకాలిక రకాలకు అదనంగా 1-2 తడులు అవసరం. ఉదయం వేళలో ఆకులు చుట్టుకుపోయినట్లు కనిపిస్తే నీటి ఎద్దడిని గుర్తించి నీరు ఇవ్వాలి.

కాండం తొలుచు పురుగు (స్టెమ్ బోరర్) మొక్కజొన్నకు ప్రధాన శత్రువు. ఇది మొలకెత్తిన 10-20 రోజుల నుంచే ఆశించి ఆకులను తిని కాండంలోకి చేరుతుంది. ఫలితంగా మొక్క ఎండిపోయి డెడ్ హార్ట్ ఏర్పడుతుంది. ఆ తర్వాత పూత, కంకిని ఆశించి దిగుబడి తగ్గిస్తుంది. నివారణకు పొలంలో కలుపు, చెత్త లేకుండా శుభ్రంగా ఉంచాలి. పురుగు సోకిన మొక్కలను పీకి నాశనం చేయాలి. 30 రోజుల దశలో ఎకరాకు 3 కిలోల కార్బోఫ్యూరాన్ 3జి గుళికలను మొక్కల మొవ్వు సుడిలో వేయాలి. లేదా మోనోక్రోటోపాస్ 1.6 మి.లీ లీటర్ నీటికి కలిపి పిచికారీ చేయాలి.

సమయానుగుణంగా సస్యరక్షణ చర్యలు పాటిస్తే మొక్కజొన్న నుంచి ఆశించిన దిగుబడి పొందవచ్చు.