మామిడి తోటల్లో కొమ్మ కత్తిరింపులు, ఎరువుల వినియోగంపై శాస్త్రవేత్త సూచనలు

మామిడి రైతులు ముదురు తోటల నుంచి మంచి దిగుబడి పొందేందుకు సరైన కొమ్మ కత్తిరింపులు, పోషక యాజమాన్యం చేపట్టాలని ఆదిలాబాద్ కృషి విజ్ఞాన కేంద్రం (KVK) శాస్త్రవేత్త డాక్టర్ సునీల్ కుమార్ సూచించారు.

కాపు తీసిన వెంటనే తెగులు సోకిన, ఎండిన, అడ్డుగా పెరిగిన కొమ్మలను తొలగించాలి. దీనివల్ల చెట్టు లోపలికి గాలి, వెలుతురు సరిగా సోకుతాయి. కత్తిరింపు చేతి రంపం లేదా పెట్రోల్ రంపంతో ఏటవాలుగా చేయాలి. వర్షం నీళ్లు కొమ్మపై నిలవకుండా ఈ ఏటవాలు కోత ఉపయోగపడుతుంది.

కత్తిరించిన వెంటనే కోత భాగానికి బోడో పేస్ట్ లేదా కాపరాక్సీక్లోరైడ్ మిశ్రమాన్ని పూయాలి. ఇలా చేస్తే తెగుళ్లు, సిలింద్రాలు సోకవు.

పదేళ్లకు మించిన ముదురు తోటల్లో ఒక్కో చెట్టుకు 1500 గ్రాముల యూరియా, 4.5 కిలోల సింగిల్ సూపర్ ఫాస్ఫేట్, 1200 గ్రాముల మ్యూరేటాఫ్ పొటాషియం ఇవ్వాలి. ఈ ఎరువులను చెట్టు మొదలు నుంచి 1.5 నుంచి 2 మీటర్ల దూరంలో చిన్న గాడి తీసి వేయాలి.

అదనంగా 100 కిలోల పశువుల ఎరువు లేదా 40 కిలోల వర్మికంపోస్ట్ చెట్టుకు చొప్పున అందించాలి. జింక్, బోరాన్, ఇనుము లోపాలు కనిపిస్తే ప్రతి చెట్టుకు 75 గ్రాముల బోరాక్స్, 150 గ్రాముల జింక్ సల్ఫేట్, 150 గ్రాముల ఫెర్రస్ సల్ఫేట్ పాదుల్లో వేసి నీటి తడి ఇవ్వాలి.

ఈ యాజమాన్య పద్ధతులతో మామిడి చెట్లకు కొత్త శక్తి వస్తుందని, వచ్చే సీజన్లో మంచి దిగుబడి వస్తుందని శాస్త్రవేత్త తెలిపారు.