బంతిపూల సాగు: అధిక దిగుబడి కోసం మేలైన యాజమాన్య పద్ధతులు

రాజేంద్రనగర్ లోని పూల పరిశోధన స్థానం శాస్త్రవేత్త జ్యోతి బంతిపూల సాగుపై కీలక సూచనలు చేశారు. బంతి సాగు సులువు, తక్కువ పెట్టుబడికి సాగుచేసుకోవచ్చునని ఆమె తెలిపారు.

మార్కెట్లో బంతిపూలకు ఏడాది పొడవునా డిమాండ్ ఉంది. శుభకార్యాలు, అలంకరణలతో పాటు కోడి దాణా, హెర్బల్ టీ వంటి ఉత్పత్తులకు కూడా బంతి వాడతారు. సరైన ప్రణాళిక, యాజమాన్య పద్ధతులు పాటిస్తే రైతులు అధిక లాభాలు పొందవచ్చు.

హైబ్రిడ్ రకాలు బీఎం4, అర్క విభ, అర్క సుబి, పూస నారంగి, పూస బసంతి వంటివి ఎకరాకు 8-10 టన్నుల దిగుబడి ఇస్తాయి. స్థానిక రకాలతో 5-6 టన్నులు వస్తాయి. ఎర్రగర్భ నేలలు, pH 6-7 మధ్య ఉండటం మేలు.

నారుమడి జూన్‌లో మొదలు పెట్టి, 15 రోజుల వ్యవధిలో నారు పెంచితే ఏడాది పొడుగూ పంట దొరుకుతుంది. నాటిన 25-30 రోజుల తర్వాత "పించింగ్" (తల తుంచడం) తప్పనిసరి. దీంతో పక్క కొమ్మలు వచ్చి మొగ్గలు ఎక్కువ అవుతాయి.

60 రోజుల నుంచి పూత మొదలై 2-3 రోజులకోసారి కోత తీసుకోవచ్చు. ఉదయం లేదా సాయంత్రం చల్లని వేళల్లో పూలు తీస్తే తాజాగా ఉంటాయి. మల్చింగ్, డ్రిప్ ఇరిగేషన్, సేంద్రియ ఎరువులతో సమానమైన దిగుబడి, పూల సైజు ఒకే విధంగా వచ్చే అవకాశం ఉంటుంది.

భూసార, నీటి పరీక్షలు చేయించుకొని సాగు ప్రారంభిస్తే మంచి ఫలితాలు ఉంటాయని జ్యోతి సూచించారు.