హైదరాబాద్-చెన్నై, బెంగళూరు బుల్లెట్ రైలు కారిడార్లకు మార్కింగ్ ప్రారంభం

హైదరాబాద్-చెన్నై, హైదరాబాద్-బెంగళూరు బుల్లెట్ రైలు కారిడార్ల అలైన్మెంట్ సర్వే కోసం క్షేత్రస్థాయిలో మార్కింగ్ మొదలైంది.

రంగారెడ్డి, నల్గొండ, వికారాబాద్ జిల్లాల్లో గత 10 రోజులుగా సర్వే బృందాలు ఈ మార్కింగ్ చేస్తున్నాయి. శంషాబాద్, మహేశ్వరం, కందుకూరు, యాచారం మండలాల మీదుగా హైదరాబాద్-చెన్నై కారిడార్ మార్కింగ్ జరుగుతోంది. శంషాబాద్, షాబాద్ మండలాల మీదుగా బెంగళూరు కారిడార్ కోసం మార్కింగ్ చేస్తున్నారు.

యాచారం మండలంలోని కురువిద్ద, మేడిపల్లి, మంకీస్గూడెం, తక్కలపల్లి, చింతపట్ల, నల్లవెల్లి, మందన, గౌరెలి గ్రామాల్లో ఇప్పటికే మార్కింగ్ పూర్తి చేసినట్లు అధికారులు తెలిపారు. ప్రాజెక్ట్ అలైన్మెంట్ సర్వే పాయింట్లను గుర్తించేందుకు ఎరుపు, తెలుపు రంగులతో ప్రత్యేక గుర్తులు వేస్తున్నారు. భూసేకరణ అవసరాలు గుర్తించేందుకు ఈ మార్కింగ్ ఉపయోగపడుతుంది.

తొలుత ఏరియల్ సర్వే నిర్వహించిన తర్వాత సాధ్యాసాధ్యాలపై అధ్యయనం కొనసాగుతోంది. ప్రస్తుతం క్షేత్రస్థాయిలో రూట్ మ్యాపింగ్ చేపట్టారు. సర్వే పూర్తయ్యాక తుది అలైన్మెంట్, స్టేషన్ల స్థానాలు, భూసేకరణ వివరాలు స్పష్టంగా తెలియనున్నాయి.

ఈ రెండు బుల్లెట్ రైలు కారిడార్లు రాష్ట్రంలో వేగవంతమైన రవాణా సౌకర్యం కల్పిస్తాయి. కేంద్ర ప్రభుత్వం ఈ ప్రాజెక్టుకు ప్రాధాన్యత ఇస్తున్నట్లు తెలుస్తోంది. భూసేకరణ ప్రక్రియ త్వరలో మొదలవుతుందని అధికారులు భావిస్తున్నారు.