మెదక్: ఆటో రుణ వివాదం.. స్నేహితుల మధ్య ఘర్షణతో రెండు హత్యలు

మెదక్ జిల్లాలో ఆటో రుణ వివాదం కారణంగా స్నేహితుల మధ్య జరిగిన ఘర్షణలో ఒకరు మృతి చెందగా, ప్రతీకారంగా మరొకరి తండ్రి హత్య చేయడంతో ఒకే రోజు రెండు మృతులు సంభవించాయి.

చిన్నశంకరంపేట మండలం సూరారం గ్రామానికి చెందిన యాట శ్రీధర్, రణబోయిన ప్రభాకర్ స్నేహితులు. వీరిద్దరు కలిసి ఫైనాన్స్ ద్వారా ఆటో కొనుగోలు చేశారు. వాయిదాల చెల్లింపు విషయంలో విభేదాలు రావడంతో వారి మధ్య గొడవలు మొదలయ్యాయి. సోషల్ మీడియాలో పరస్పర ఆరోపణలు చేసుకున్నారు. ప్రభాకర్ శ్రీధర్ చెల్లెలు వరసయ్య యువతిని ప్రేమ వివాహం చేసుకోవడంతో వివాదం మరింత తీవ్రమైంది. గతంలో ఆటో విషయంలో గొడవ జరిగి ప్రభాకర్ శ్రీధర్‌ను కత్తితో దాడి చేయగా, చిన్నశంకరంపేట పోలీస్ స్టేషన్‌లో హత్యాయత్నం కేసు నమోదైంది.

ఈ నేపథ్యంలో శ్రీధర్ ఓ యువకుడితో కలిసి చేగుంట మండలం అనంతసాగర్ వెళ్తుండగా, ప్రభాకర్ మిత్రులతో కలిసి ఆటోలో వచ్చి వారి బైకును ఢీ కొట్టాడు. దీంతో శ్రీధర్ ఎగిరి అక్కడి విగ్రహానికి బలంగా ఢీ కొట్టుకుని తలకు తీవ్ర గాయాలయ్యాయి. అతన్ని కింద పడవేసి ఆటోతో తొక్కించి, విచక్షణ రహితంగా కొట్టి హత్య చేశారు. సంఘటనా స్థలానికి చేరుకున్న శ్రీధర్ కుటుంబ సభ్యులు, గ్రామస్థులు న్యాయం చేయాలని డిమాండ్ చేస్తూ ఆందోళన చేశారు. తూప్రాన్ డీఎస్పీ నరేంద్ర గౌడ్ సంఘటన స్థలానికి చేరుకొని, నిందితులపై చట్టపరమైన చర్యలు తీసుకుంటామని చెప్పి శాంతింప చేశారు.

కొన్ని గంటల తర్వాత శ్రీధర్ కుటుంబ సభ్యులు ప్రభాకర్ ఇంటిపై దాడికి వెళ్లగా, అక్కడ ఎవరూ లేరు. ప్రభాకర్ తండ్రి యాదగిరి తూప్రాన్‌లోని ఒక హోటల్‌లో భోజనం చేస్తుండగా, వారు అతన్ని అక్కడ నుంచి తీసుకెళ్లి కొట్టి చంపారు. మృతదేహానికి బండరాయి కట్టి హకీంపేట సమీపంలోని హల్దీ వాగులో పడివేశారు. పోలీసులు యాదగిరి మృతదేహాన్ని గుర్తించి నర్సాపూర్ ప్రభుత్వ ఆసుపత్రికి తరలించారు.

ఈ రెండు హత్యలకు సంబంధించి రెండు వర్గాలపై పోలీసులు కేసులు నమోదు చేశారు. గ్రామంలో ఉద్రిక్తతలు తలెత్తకుండా పికెటింగ్ ఏర్పాటు చేశారు. ప్రధాన నిందితుడిగా భావిస్తున్న ప్రభాకర్‌తో పాటు మరికొందర్ని అదుపులోకి తీసుకుని దర్యాప్తు చేస్తున్నట్లు సమాచారం. శ్రీధర్, యాదగిరి అంత్యక్రియలు నిర్వహించారు.