మెదక్‌లో ఆటో EMI వివాదం రెండు హత్యలకు దారి; గ్రామంలో ఉద్రిక్తత

మెదక్ జిల్లా చిన్నశంకరంపేట మండలం సూరారం గ్రామంలో ఆటో కొనుగోలు వివాదం రెండు హత్యలకు దారితీసింది. సూరారం గ్రామానికి చెందిన శ్రీధర్, ప్రభాకర్ స్నేహితులు. వీరిద్దరూ కలిసి ఆటో కొనుగోలు చేశారు.

ఈఎంఐ చెల్లింపుల విషయంలో ఇద్దరి మధ్య గొడవ జరిగింది. దీంతో ప్రభాకర్ శ్రీధర్‌ను ఆటోతో వెంబడించి ఢీకొట్టాడు. చనిపోయే వరకు ఆటోను ముందుకు వెనక్కు నడిపాడని స్థానికులు తెలిపారు. ఈ ఘటనలో శ్రీధర్ మరణించాడు.

శ్రీధర్ మరణంతో ఆయన బంధువులు తీవ్ర ఆగ్రహంతో ప్రభాకర్ తండ్రి యాదగిరిపై దాడి చేశారు. మాసాయిపేటలోని ఓ డాబా వద్ద యాదగిరి కనిపించగా, అతనిని చంపి మృతదేహానికి బండరాయి కట్టి హల్దీవాగులో పడేశారు.

పోలీసులు ఘటనను గుర్తించి వెంటనే చర్యలు చేపట్టారు. యాదగిరి మృతదేహాన్ని నర్సాపూర్ ప్రభుత్వ ఆసుపత్రికి, శ్రీధర్ మృతదేహాన్ని తూప్రాన్ ప్రభుత్వ ఆసుపత్రికి తరలించారు. తూప్రాన్ డీఎస్పీ నరేంద్ర గౌడ్ స్వయంగా పర్యవేక్షిస్తూ, సూరారం గ్రామంతోపాటు రెండు ఆసుపత్రుల వద్ద పోలీసు బలగాలను మోహరించారు. ఎలాంటి అవాంఛనీయ ఘటనలు జరగకుండా పటిష్ట బందోబస్తు ఏర్పాటు చేశారు. పోస్ట్మార్టం తర్వాత మృతదేహాలు గ్రామానికి తీసుకొచ్చే సమయంలో ఉద్రిక్తత చెలరేగే అవకాశం ఉన్నందున అదనపు భద్రతా చర్యలు తీసుకుంటున్నట్లు పోలీసులు తెలిపారు. ప్రస్తుతం గ్రామంలో పరిస్థితి అదుపులో ఉందని, కుటుంబాలను వేర్వేరుగా ఉంచినట్లు అధికారులు చెప్పారు.