పోలీసు అమరవీరుల సంస్మరణ వారంలో మెగా రక్తదాన శిబిరం, డీజీపీ సీవీ ఆనంద్ ప్రారంభం

పోలీసు అమరవీరుల సంస్మరణ వారోత్సవాల్లో భాగంగా హైదరాబాద్ పేట్లబుర్జులోని CRA హెడ్ క్వార్టర్స్‌లో మెగా రక్తదాన శిబిరం జరిగింది. డీజీపీ సీవీ ఆనంద్ ఈ శిబిరాన్ని ప్రారంభించారు.

కార్యక్రమానికి పోలీస్ కమిషనర్ సజ్జనర్ హాజరయ్యారు. పోలీస్ అధికారులు, సిబ్బందితో పాటు సాధారణ ప్రజలు కూడా స్వచ్ఛందంగా ముందుకు వచ్చారు. వారు పెద్ద సంఖ్యలో రక్తదానం చేశారు.

సేకరించిన రక్తాన్ని తలసేమియా బాధితులకు, అత్యవసర చికిత్స అవసరమయ్యే రోగులకు అందించనున్నారు. రక్తదానం చేసిన వారందరికీ డీజీపీ అభినందనలు తెలిపారు.

దేశవ్యాప్తంగా ప్రతి సంవత్సరం పోలీసు అమరవీరుల సంస్మరణ వారోత్సవాలు నిర్వహిస్తారు. డ్యూటీలో ప్రాణాలు కోల్పోయిన పోలీస్ సిబ్బందిని ఈ వారంలో స్మరించుకుంటారు.

రక్తదానం ఒక రకంగా ప్రాణదానమే అని డీజీపీ అన్నారు. బ్లడ్ బ్యాంకుల్లో రక్తం ఇచ్చేందుకు చాలామంది ముందుకు రావడం లేదని తనకు రిపోర్టులు వస్తున్నాయని చెప్పారు. ఇచ్చిన రక్తాన్ని, అవయవాలను అమ్ముతున్నారనే అపోహ ప్రజల్లో ఉందని ఆయన పేర్కొన్నారు. ఈ అపోహను తొలగించి ప్రజల్లో నమ్మకం కలిగించాలని కోరారు. ఈ విషయంలో ప్రైవేట్ ఆస్పత్రులకు కూడా ఆయన విజ్ఞప్తి చేశారు.