జగన్నాధపురంలో రైతుల కోసం 150 స్టాల్స్‌తో మెఘా రైతు మేళా

ఖమ్మం జిల్లా చింతకాని మండలం జగన్నాధపురంలో ముఖ్యమంత్రి రేవంత్ రెడ్డి పర్యటన సందర్భంగా మెఘా రైతు మేళా ఏర్పాటు చేశారు. ఈ రైతు మేళాలో 150 స్టాల్స్ ద్వారా రైతులకు వ్యవసాయం, పాడి పరిశ్రమ, పశువర్ధకం, మత్స్య పరిశ్రమ, యంత్రీకరణ వంటి వివిధ రంగాలపై అవగాహన కల్పించారు.

వ్యవసాయ శాఖ, హార్టికల్చర్, సెరికల్చర్, ఫిషరీస్ డిపార్ట్మెంట్, పామాయిల్ బోర్డు తదితర విభాగాలు స్టాల్స్ ఏర్పాటు చేశాయి. ఎలినో ప్రభావం, వాతావరణానికి అనుకూలంగా పంటల ఎంపిక, డ్రిప్ ఇరిగేషన్ విధానాలపై శాస్త్రవేత్తలు సలహాలు అందించారు.

జిల్లాలోని 20 మండలాల నుంచి సుమారు 5,000 మంది రైతులను 150 బస్సుల్లో ఈ రైతు మేళాకు తీసుకువచ్చారు. రైతులు వివిధ స్టాల్స్‌ను సందర్శించి, సాంకేతిక సమాచారం పొందారు. వ్యవసాయ పనిముట్లు, సోలార్ విద్యుత్ ఉత్పత్తి, మోడల్ సోలార్ విలేజ్ ఏర్పాటుపై ప్రత్యేక స్టాల్ కూడా ఉన్నాయి.

మంత్రులు భట్టి విక్రమార్క, తుమ్మల నాగేశ్వర రావు, పొంగులేటి శ్రీనివాస రెడ్డి ఈ రైతు మేళాను పరిశీలించారు. రేపు జరగనున్న రైతు ఆశీర్వాద సభ నేపథ్యంలో ఏర్పాటు చేసిన ఈ మేళా రైతులకు ఎంతో ఉపయోగకరంగా ఉందని పలువురు రైతులు తెలిపారు. పామాయిల్ సాగుకు అనుకూలత, యంత్రీకరణ ద్వారా కూలీల కొరత సమస్యకు పరిష్కారం వంటి అంశాలపై వివరించారు.