22A నిషేధిత భూములపై మంత్రి పొంగులేటి సమీక్ష; కొత్తగా ఏ భూములు జాబితాలో చేర్చలేదు

హైదరాబాద్, రంగారెడ్డి, మేడ్చల్-మల్కాజ్‌గిరి, సంగారెడ్డి జిల్లాల కలెక్టర్లు, సబ్ రిజిస్ట్రార్లతో మంత్రి పొంగులేటి శ్రీనివాస్ రెడ్డి సమీక్ష సమావేశం నిర్వహించారు. 22A నిషేధిత భూములపై ప్రజల్లో అపోహలు వద్దని, తమ ప్రభుత్వం కొత్తగా ఎలాంటి భూములను నిషేధిత జాబితాలో చేర్చలేదని స్పష్టం చేశారు. గత ప్రభుత్వం నుంచి కొనసాగుతున్న సాంకేతిక సమస్యలను పరిష్కరిస్తామని తెలిపారు.

ఫోర్జరీ, బోగస్ డాక్యుమెంట్లను అడ్డుకునేందుకు భూముల క్రమబద్ధీకరణకు సంబంధించిన ప్రభుత్వ ఉత్తర్వులు, మెమోలు, భూసేకరణ ప్రొసీడింగ్స్, లేఔట్ అనుమతుల డాక్యుమెంట్లను ఈ నెల 4వ తేదీలోగా ఆన్‌లైన్‌లో అప్‌లోడ్ చేయాలని అధికారులను ఆదేశించారు. పహారేలు (సర్వే రికార్డులు) కూడా సబ్ రిజిస్ట్రార్‌కు యాక్సెస్ ఉండేలా చూడాలన్నారు.

పీవోబీ (ప్రొహిబిటరీ ఆర్డర్స్ బుక్) దరఖాస్తులను ఇకపై తహశీల్దారుకు కాకుండా నేరుగా కలెక్టర్‌కు పంపాలని సూచించారు. సబ్ రిజిస్ట్రార్లకు అదనపు విచక్షణ అధికారాలు ఉండవని, ఆన్‌లైన్‌లో నమోదైన దానికి మాత్రమే ఆమోదం తెలిపేలా వారి అధికారాలు పరిమితం చేయాలని స్పష్టం చేశారు. ప్రభుత్వ ఆస్తులను కాపాడటంలో రాజీ ఉండదని, చిన్న తప్పు చేసినా కఠిన చర్యలు తీసుకుంటామని హెచ్చరించారు.

అదే సమయంలో, పీవోబీ జాబితాలోని ఆస్తుల రిజిస్ట్రేషన్లను గుడ్డిగా తిరస్కరించకుండా, మూడు రోజుల్లో సరైన కారణాలతో వివరణ ఇవ్వాలని అధికారులకు సూచించారు. వచ్చిన దరఖాస్తుల్లో జెన్యూన్ దరఖాస్తులను గుర్తించి, అర్హులైన భూమి యజమానులకు ఊరట కల్పించాలని కలెక్టర్లను ఆదేశించారు.