రెండు వారాలైనా ఆచూకీ లేదు: చిన్నారి జ్ఞానేశ్వరి మిస్సింగ్ కేసులో మిస్టరీ కొనసాగింపు

కాకినాడ జిల్లా తుని సమీపంలోని సిహెచ్ అగ్రహారంలో రెండేళ్ల చిన్నారి జ్ఞానేశ్వరి జూన్ 6న అదృశ్యమై రెండు వారాలు గడిచింది. చిన్నారి ఆచూకీపై ఎలాంటి సమాచారం లభించలేదు.

జ్ఞానేశ్వరి చివరిసారిగా ఉదయం 11:50 నిమిషాలకు కనిపించింది. ఆ సమయంలో చిన్నారితో పాటు పెంపుడు కుక్క కూడా ఉంది. స్థానిక ఆలయం దగ్గర సీసీ కెమెరాల్లో మధ్యాహ్నం 1 గంటల సమయంలో కుక్క మాత్రమే కనిపించింది. మూడు రోజుల తర్వాత పెంపుడు కుక్క ఇంటికి తిరిగి వచ్చింది. మరో రెండు రోజులకు కుక్క చనిపోయింది. అనుమానాస్పద మృతి కావడంతో పోస్ట్మార్టం నిర్వహించగా, ఐదు రోజులు గడిచినా నివేదిక అందలేదు.

జ్ఞానేశ్వరి కుటుంబం నివసించే ప్రాంతం సమీపంలో అడవి ఉంది. ఈ అడవిలో వన్యప్రాణుల వేట జరుగుతుందని, జంతువులను పట్టేందుకు ఎలక్ట్రికల్ ఫెన్సింగ్ ఏర్పాటు చేస్తారని గ్రామస్థులు తెలిపారు. జ్ఞానేశ్వరి కూడా అడవి వైపు వెళ్లి ఇలాంటి విద్యుత్ కంచెకు తగిలి ప్రమాదానికి గురై ఉండొచ్చని స్థానికులు అనుమానిస్తున్నారు. వేట ముఠాలు చిన్నారిని ఏదైనా చేసి విషయాన్ని దాచిపెట్టి ఉండొచ్చనే చర్చ జరుగుతోంది.

కేసు దర్యాప్తులో ఎలాంటి పురోగతి లేదు. ఒక్క క్లూ కూడా లభించలేదు. జ్ఞానేశ్వరి తల్లిదండ్రులు మాత్రం చిన్నారి తిరిగి వస్తుందని ఆశగా ఎదురుచూస్తున్నారు. పోస్ట్మార్టం నివేదిక రావడం, పోలీసు దర్యాప్తు ఫలితాలు తెలియాల్సి ఉంది.