అమరావతిలో ఎమ్మెల్యే, ఎమ్మెల్సీ క్వార్టర్స్ నిర్మాణం పూర్తి; 13న సీఎం చంద్రబాబు అప్పగింత

అమరావతి రాజధాని ప్రాంతంలో ఎమ్మెల్యే, ఎమ్మెల్సీల నివాస సముదాయం నిర్మాణం పూర్తయింది. రాయపూడి ప్రాంతంలో సుమారు 10.5 ఎకరాల స్థలంలో ఈ సముదాయాన్ని నిర్మించారు.

మొత్తం 12 టవర్లు, ఒక్కో టవర్‌లో 12 అంతస్తులు ఉంటాయి. ప్రతి అంతస్తులో రెండు చొప్పున మొత్తం 288 విశాలమైన నివాస గృహాలు అందుబాటులో ఉన్నాయి. ఒక్కో ఫ్లాట్‌ విస్తీర్ణం దాదాపు 3,500 చదరపు అడుగులు.

ఫ్లాట్లలో ఏసీ, ప్రత్యేక విజిటర్ హాల్, టీవీ ఏర్పాటు, ఈత కొలను వంటి సౌకర్యాలు కల్పించారు.

ఈ నెల 13న ముఖ్యమంత్రి చంద్రబాబు నాయుడు ఈ సముదాయాన్ని సాధారణ పరిపాలన శాఖ (జీఏడీ)కి అధికారికంగా అప్పగిస్తారు. ఆ తర్వాత ప్రతి ఎమ్మెల్యే, ఎమ్మెల్సీకి ఫ్లాట్లు కేటాయించి గృహప్రవేశ కార్యక్రమాలు నిర్వహిస్తారు. ప్రజాప్రతినిధులు ఇక్కడి నుంచే తమ కార్యకలాపాలు కొనసాగించవచ్చని అధికారులు తెలిపారు.