ధ్యాన్‌చంద్‌ హాకీ టీమ్ న్యూజిలాండ్‌లో చరిత్ర సృష్టించి 100 ఏళ్లు: ప్రధాని మోదీ

ప్రధాని నరేంద్ర మోదీ న్యూజిలాండ్ పర్యటనలో భారత-న్యూజిలాండ్ క్రీడా సంబంధాల 100వ వార్షికోత్సవాన్ని గుర్తు చేశారు. 1926లో మేజర్ ధ్యాన్‌చంద్ నేతృత్వంలోని భారత హాకీ జట్టు న్యూజిలాండ్‌లో పర్యటించి చారిత్రక విజయాలు సాధించిందని, ఆ స్ఫూర్తి నేటికీ ఇరు దేశాల క్రీడా భాగస్వామ్యాన్ని నడిపిస్తోందని ఆయన తెలిపారు. ఈ శతాబ్ది సందర్భంగా రెండు దేశాల్లో పలు క్రీడా కార్యక్రమాలు నిర్వహిస్తున్నామని, క్రికెట్‌తో పాటు ఇతర క్రీడల్లో సహకారాన్ని పెంచేందుకు ‘స్పోర్ట్స్ జాయింట్ యాక్షన్ ప్లాన్’ రూపొందించామని ప్రధాని వెల్లడించారు. ఇటీవల భువనేశ్వర్‌లో న్యూజిలాండ్ రగ్బీ, రగ్బీ ఇండియా సంయుక్తంగా నిర్వహించిన కోచింగ్ ప్రోగ్రామ్ విజయవంతమైందని, ఇది కొత్త క్రీడా సహకారానికి నాంది అని ఆయన అభిప్రాయపడ్డారు. ధ్యాన్‌చంద్‌ను భారత హాకీ దిగ్గజంగా న్యూజిలాండ్ ప్రజలు ఇప్పటికీ గుర్తుంచుకోవడం గర్వకారణమని మోదీ అన్నారు. ఈ ప్లాన్ ద్వారా యువ క్రీడాకారుల మార్పిడి, శిక్షణ, సాంకేతిక సహకారం వంటి అంశాలకు ప్రాధాన్యత ఇవ్వనున్నట్లు తెలిపారు. రాబోయే నెలల్లో మరిన్ని ఉమ్మడి క్రీడా ఈవెంట్‌లు ప్రకటించే అవకాశం ఉంది.