చంపినా సరే బంగ్లాదేశ్ వెళ్తా: డిసెంబర్‌లో లొంగిపోతానన్న షేక్ హసీనా

బంగ్లాదేశ్ మాజీ ప్రధాని షేక్ హసీనా త్వరలో స్వదేశానికి తిరిగి వెళ్లనున్నట్లు ప్రకటించారు. తనపై హత్యా బెదిరింపులు ఉన్నా, కోర్టులో లొంగిపోయేందుకు సిద్ధంగా ఉన్నానని ఆమె చెప్పారు. డిసెంబర్ నెలలో అవామీ లీగ్ సీనియర్ నేతలతో కలిసి దేశానికి వెళతానని తెలిపారు.

భారతదేశంలో ఆశ్రయం పొందుతున్న హసీనా, తనను అరెస్ట్ చేసినా లేదా చంపినా సరే స్వదేశంలోనే చనిపోవాలనుకుంటున్నట్లు వెల్లడించారు. తన తల్లిదండ్రులను ఖననం చేసిన చోట తన సొంతగడ్డపై మరణించాలనే కోరిక ఉందన్నారు. ప్రస్తుతం తన పార్టీ నేతలు, కార్యకర్తలు తీవ్ర అణచివేతకు గురవుతున్నారని హసీనా ఆవేదన వ్యక్తం చేశారు.

2024 లో బంగ్లాదేశ్‌లో చెలరేగిన ప్రభుత్వ వ్యతిరేక నిరసనలు హింసాత్మకంగా మారడంతో హసీనా దేశం విడిచి భారత్‌కు వచ్చారు. ఆ నిరసనలను అణచివేయడంలో ఆమెకు పాత్ర ఉందని ఆరోపిస్తూ పలు కేసులు నమోదయ్యాయి. హసీనా ఈ ఆరోపణలను తోసిపుచ్చారు. అయితే, బంగ్లాదేశ్ అంతర్జాతీయ నేరాల ట్రిబ్యునల్ ఆమెకు గతేడాది మరణ శిక్ష విధించింది.

తన అప్పగింతపై భారత ప్రభుత్వానికి బంగ్లాదేశ్ అధికారులు అనేక లేఖలు రాస్తున్నారని, ఈ నేపథ్యంలోనే స్వదేశానికి వెళ్ళాలని నిర్ణయించినట్లు హసీనా తెలిపారు.