రాకాలో కృతి సనన్ పాత్ర?.. అల్లు అర్జున్-అట్లీ సినిమా తాజా వివరాలు

నటుడు అల్లు అర్జున్, దర్శకుడు అట్లీ కాంబినేషన్‌లో రూపొందుతున్న ‘రాకా’ చిత్రంలో బాలీవుడ్ నటి కృతి సనన్ ఒక సర్ప్రైజ్ పాత్రలో కనిపించనున్నారని సమాచారం. ఇంటర్వెల్ ఎపిసోడ్‌లో కృతి పాత్ర ఆకట్టుకుంటుందని, ఇప్పటికే ఆమె చిత్రీకరణ పూర్తయిందని బాలీవుడ్ వర్గాలు తెలిపాయి.

ఒకే సినిమాలో ఐదారు మంది హీరోయిన్లు నటించడం ఇటీవల కొత్త ట్రెండ్‌గా మారింది. ‘రాకా’లో దీపికా పదుకొణే లీడ్ హీరోయిన్‌గా నటిస్తుండగా, రష్మిక మందన్న విలన్ రోల్‌లో, మృణాల్ ఠాకూర్, జాన్వి కపూర్ కీలక పాత్రల్లో కనిపించనున్నారని ఇప్పటికే ప్రచారం ఉంది. తాజాగా కృతి సనన్ కూడా ఈ ప్రాజెక్ట్‌లో చేరినట్టు తెలుస్తోంది.

చిత్రీకరణను డిసెంబర్ నాటికి పూర్తి చేయాలని అల్లు అర్జున్ లక్ష్యంగా పెట్టుకున్నారు. ఆ దిశగా దర్శకుడు అట్లీ షెడ్యూల్స్ రూపొందిస్తున్నారు. భారీ గ్రాఫిక్స్‌పై ఆధారపడిన ఈ సినిమా విడుదల వచ్చే ఏడాది డిసెంబర్‌లో ఉండొచ్చు. గ్రాఫిక్స్ పని ఆలస్యమైతే రిలీజ్ వాయిదా పడే అవకాశం ఉందని సన్నిహితులు అంటున్నారు.

ఈ చిత్రంలో అల్లు అర్జున్ నాలుగు వేర్వేరు పాత్రలు పోషిస్తున్నట్టు సమాచారం. తాత, తండ్రి, తనయుడు వంటి విభిన్న పాత్రలతో ప్రేక్షకులను ఆకట్టుకోనున్నారు. హీరో ఇన్ని పాత్రలు చేయడం వల్లే ఎక్కువ మంది హీరోయిన్లు ఉండటం అనే చర్చా జరుగుతోంది.

ప్రస్తుతం వినిపిస్తున్న ఈ వివరాలపై చిత్ర నిర్మాణ సంస్థ అధికారికంగా ఎలాంటి ప్రకటన చేయలేదు.