భారత్-స్లోవేకియా సంబంధాలు మరింత బలోపేతం: సమగ్ర భాగస్వామ్య ఒప్పందంపై సంతకాలు

ప్రధాని నరేంద్ర మోదీ స్లోవేకియా ప్రధాని రాబర్ట్ ఫికోతో సమావేశమయ్యారు. ఇరు దేశాల మధ్య సమగ్ర భాగస్వామ్యాన్ని మరింత బలోపేతం చేసే ఒప్పందాలపై వారు సంతకాలు చేశారు.

ఈ సందర్భంగా డిజిటల్ పబ్లిక్ ఇన్ఫ్రాస్ట్రక్చర్, అంతరిక్ష పరిశోధన, డిజిటల్ టెక్నాలజీ రంగాల్లో అవగాహన ఒప్పందాలు (ఎంఓయూ) కుదిరాయి. రక్షణ రంగంలో సహకారానికి లెటర్ ఆఫ్ ఇంటెంట్‌పై కూడా సంతకాలు జరిగాయి. నైపుణ్యం కలిగిన సిబ్బంది రాకపోకల కోసం లేబర్ మైగ్రేషన్ ఎంఓయూ కుదిరింది. సివిల్ న్యూక్లియర్ ఎనర్జీ రంగంలోనూ సహకారం కొనసాగిస్తామని ఇరు నేతలు ప్రకటించారు.

ప్రధాని మోదీ మాట్లాడుతూ, ప్రధాని ఫికోకు ఘన స్వాగతం పలికారు. ఆయన భారతదేశానికి నిజమైన మిత్రుడని, అనుభవజ్ఞుడైన నాయకుడని ప్రశంసించారు. భారత్-స్లోవేకియా సంబంధాలు కొత్త శిఖరాలకు చేర్చడంలో ఫికో నిబద్ధత కీలకమని మోదీ పేర్కొన్నారు.

భారత ఆర్థిక ప్రగతి, డిజిటల్ విప్లవాన్ని స్లోవేకియా ప్రధాని ప్రత్యేకంగా అభినందించారు. రానున్న రోజుల్లో భారత్ మూడో అతిపెద్ద ఆర్థిక శక్తిగా అవతరిస్తుందని ఫికో అన్నారు.