భారత్-జపాన్ కీలక చర్చలు: రక్షణ, AI, ఇంధన రంగాల్లో సహకారం పెంపు

ప్రధాని నరేంద్ర మోదీ ఢిల్లీలో జపాన్ ప్రధాని సనాయే తకాయిచితో ద్వైపాక్షిక చర్చలు నిర్వహించారు. రక్షణ, ఫార్మా, కృత్రిమ మేధ (AI), ఇంధన భద్రత రంగాల్లో సహకారాన్ని మరింత పెంచుకోవాలని ఇరు నేతలు నిర్ణయించారు.

ఈ సందర్భంగా భారత్-జపాన్ తొలి రక్షణ సహకార ఒప్పందంపై సంతకాలు జరిగాయి. ఆర్థిక, ఇంధన భద్రత, ఆర్టిఫిషియల్ ఇంటెలిజెన్స్ అంశాలపైనా పలు ఒప్పందాలు కుదిరాయి.

రాబోయే పదేళ్లలో భారత్లో జపాన్ పెట్టుబడులు 10 ట్రిలియన్ యెన్లను దాటాలని ప్రధాని మోదీ ఆశాభావం వ్యక్తం చేశారు. జపాన్ ప్రధాని తకాయిచి 129 రంగాల్లో 2 ట్రిలియన్ యెన్ల పెట్టుబడులు పెట్టనున్నట్లు తెలిపారు.

ఇంధన భద్రతను పెంచేందుకు బయోమాస్, గ్రీన్ హైడ్రోజన్ ప్రాజెక్టులను సంయుక్తంగా చేపడతామని చెప్పారు. 2030 నాటికి భారత్లో 1,000 బయోగ్యాస్ ప్లాంట్లు ఏర్పాటు చేయడంతోపాటు 4 లక్షల టన్నుల గ్రీన్ అమోనియా ప్రాజెక్టుపై కలిసి పని చేస్తామని తకాయిచి ప్రకటించారు.

ఢిల్లీలో జరిగిన భారత్-జపాన్ జాయింట్ ఎకనామిక్ ఫోరమ్‌లో ఇరు నేతలు పాల్గొని బిజినెస్ వీక్‌ను ప్రారంభించారు. పశ్చిమాసియా సహా తాజా ప్రపంచ పరిస్థితులపై కూడా వారు చర్చించారు.