అనంతపురంలో కొడుకును కత్తెరతో పొడిచి చంపిన తల్లి

అనంతపురం నగరంలో ఒక తల్లి తన కొడుకును కత్తెరతో పొడిచి చంపిన ఘటన చోటుచేసుకుంది.

మృతుడు సురేంద్ర అనే యువకుడు మద్యానికి బానిసై, తల్లి సునీత నుండి మద్యం కొనడానికి డబ్బులు అడుగుతూ నిత్యం వేధించేవాడు. రోజురోజుకు వేధింపులు పెరగడంతో ఆమె మానసికంగా కృంగిపోయింది.

బుధవారం కూడా కొడుకు గొడవ పడటంతో తీవ్ర ఆగ్రహానికి లోనైన సునీత, ఇంట్లో ఉన్న కత్తెర తీసుకొని సురేంద్ర గొంతులో బలంగా పొడిచింది. దీంతో అతను అక్కడికక్కడే మరణించాడు.

సమాచారం అందుకున్న అనంతపురం మూడో పట్టణ పోలీసులు ఘటనా స్థలానికి చేరుకొని మృతదేహాన్ని పరిశీలించారు. సునీతపై కేసు నమోదు చేసి దర్యాప్తు ప్రారంభించారు. ఈ హత్య నిత్య వేధింపుల కారణంగా జరిగిందా లేక ఇతర కారణాలు ఉన్నాయా అనే కోణంలో పోలీసులు విచారిస్తున్నారు.