మల్టీప్లెక్స్‌లలో పాప్‌కార్న్ ధరలపై ప్రేక్షకుల ఆందోళన, చర్చ

సినిమా థియేటర్‌లలో, ముఖ్యంగా మల్టీప్లెక్స్‌లలో పాప్‌కార్న్, కూల్‌డ్రింక్‌ల ధరలు ఎక్కువగా ఉండడం ప్రేక్షకుల ఆందోళనకు కారణమవుతోంది. ఈ ధరలు టికెట్ ధరల కంటే ఎక్కువగా ఉండడంతో, మధ్యతరగతి కుటుంబాలు థియేటర్‌లకు వెళ్లేందుకు వెనుకడుగు వేస్తున్నారు.

ఇటీవల, ఓ ప్రేక్షకుడు ట్విట్టర్‌లో పెట్టిన బిల్లు వైరల్‌గా మారింది. ఆ బిల్లులో 55 గ్రాముల చీజ్ పాప్‌కార్న్ ధర ₹460, 600 ml పెప్సీ బాటిల్ ధర ₹360 చూపించారు. మొత్తం ₹820 ఖర్చు అయింది.

నటుడు రామ్ చరణ్ థియేటర్లలో పాప్‌కార్న్ ధరలు తగ్గిస్తే బాగుంటుందని అభిప్రాయపడ్డారు. దర్శకుడు తేజ, నిర్మాత నాగవంశి కూడా ఈ ధరలపై ఆందోళన వ్యక్తం చేశారు. మరోవైపు, మల్టీప్లెక్స్ ఓనర్లు ఈ ధరల వెనుక నిర్వహణ ఖర్చులు ఉన్నాయని చెప్తున్నారు. మల్టీప్లెక్స్ థియేటర్ అధినేత సునీల్ నారంగ్ మాట్లాడుతూ, ఏసీలు, పలు స్క్రీన్‌ల నిర్వహణ, ఇతర ఖర్చులు భరించాల్సి ఉంటుందని, ధరలు తగ్గించడం సాధ్యం కాదని స్పష్టం చేశారు. భారతదేశంలో ఫుడ్ అండ్ బెవరేజెస్ మార్కెట్ విలువ సుమారు ₹1,500 కోట్లు.

ప్రేక్షకులు పెరిగిన టికెట్ ధరలతో పాటు, స్నాక్స్ ధరల భారం వల్ల థియేటర్లకు దూరంగా ఉంటున్నారు. చాలామంది సినిమాలు ఓటీటీలో రిలీజ్ అయ్యాక చూసుకోవడానికి మొగ్గుచూపుతున్నారు. ఫలితంగా, సినిమా కలెక్షన్లపై ప్రతికూల ప్రభావం పడుతోంది.

థియేటర్ ఓనర్లు, ప్రేక్షకుల సౌకర్యం దృష్టిలో పెట్టుకుని ధరలపై పునరాలోచన చేస్తారా లేదా అన్నది వేచి చూడాలి.