ముంబైలో 20 సెం.మీ వర్షం, రెడ్ అలర్ట్; మ్యాన్‌హోల్‌లో పడి వృద్ధుడు మృతి

ముంబైలో గడిచిన 24 గంటల్లో 20 సెంటీమీటర్ల వర్షం కురిసింది. దీంతో నగరంలోని పలు ప్రాంతాలు జలమయమయ్యాయి. భారత వాతావరణ శాఖ (IMD) ముంబై, థానే, పాల్ఘర్, రాయగడ జిల్లాలకు రెడ్ అలర్ట్ జారీ చేసింది.

అంధేరి, కింగ్ సర్కిల్, గాంధీ మార్కెట్ వంటి ముఖ్య ప్రాంతాలు నీట మునిగాయి. దాదా రైల్వే స్టేషన్ ట్రాక్‌లు జలమయం కావడంతో సబర్బన్ రైళ్లు ఆలస్యంగా నడుస్తున్నాయి. తూర్పు శివారులోని ములుండ్ మిధానగర్ మున్సిపల్ స్కూల్ వద్ద 23.08 సెం.మీ, మాన్ఖుర్ద్ ఫైర్ స్టేషన్ వద్ద 22.86 సెం.మీ, శాంతాక్రజ్ వర్క్‌షాప్ వద్ద 22.34 సెం.మీ గరిష్ట వర్షపాతం నమోదైంది.

చండివల్లిలో రోడ్డుపై మెయింటెనెన్స్ పని జరుగుతుండగా, మ్యాన్‌హోల్ తెరిచి ఉంచడంతో అటుగా వెళ్తున్న 60 ఏళ్ల వృద్ధుడు ప్రమాదవశాత్తు అందులో పడి కొట్టుకుపోయాడు. ఈ ఘటనపై బృహన్ముంబై మున్సిపల్ కార్పొరేషన్ నలుగురు అధికారులను సస్పెండ్ చేసి, ఉన్నత స్థాయి దర్యాప్తు కమిటీని నియమించింది. ఈ వారంలో వర్ష సంబంధిత రెండో మరణం ఇది.

రానున్న 24 గంటల్లో ముంబై శివారు ప్రాంతాల్లో భారీ నుంచి అతి భారీ వర్షాలు కురుస్తాయని IMD అంచనా వేసింది. గాలులు గంటకు 50-60 కి.మీ వేగంతో వీస్తాయని, సముద్రంలో అలలు 4.27 మీటర్ల ఎత్తు వరకు ఎగసిపడే అవకాశం ఉందని హెచ్చరించింది. ఇదిలా ఉండగా, నైరుతి ఋతుపవనాలు ఢిల్లీకి చేరుకున్నాయి. సాధారణం కంటే ఐదు రోజులు ఆలస్యంగా వచ్చిన రుతుపవనాలతో ఢిల్లీలో వర్షాలు కురుస్తున్నాయి. వచ్చే 4-5 రోజుల్లో కొంకన్ తీరం, గోవా, దక్షిణ గుజరాత్, ఒడిశా, మధ్య భారతదేశంలో విస్తారంగా వర్షాలు కురుస్తాయని వాతావరణ శాఖ తెలిపింది.