ముంబైలో వరుసగా రెండో రోజు భారీ వర్షం; పాల్ఘర్‌లో రెడ్ అలర్ట్, విద్యా సంస్థలకు సెలవు

ముంబై నగరంలో వరుసగా రెండో రోజు భారీ వర్షం కురిసింది. ఈ కారణంగా నగరంలోని పలు ప్రాంతాలు నీట మునిగాయి. గత 24 గంటల్లో కొన్ని ప్రాంతాల్లో 100 మిల్లీమీటర్లకు పైగా వర్షపాతం నమోదైంది.

వర్షాల వల్ల రోడ్లు చెరువులను తలపించాయి. రహదారులపై మోకాలి లోతు నీరు నిలిచింది. దీంతో పలు చోట్ల ట్రాఫిక్ జామ్ అయింది. ప్రతికూల వాతావరణం కారణంగా ముంబై విమానాశ్రయంలో మూడు విమానాలను దారి మళ్లించారు.

పాల్ఘర్ జిల్లాలో కుండపోత వర్షం కురుస్తోంది. అక్కడ అధికారులు రెడ్ అలర్ట్ జారీ చేశారు. స్థానిక విద్యా సంస్థలకు ఇవాళ సెలవు ప్రకటించారు. థానే, పాల్ఘర్ సహా ముంబై మెట్రోపాలిటన్ ప్రాంతంలోని అనేక ప్రాంతాలు ఇప్పటికే నీట మునిగాయి.

మహారాష్ట్రలోని పలు ప్రాంతాల్లో భారీ వర్షాలు కురిసే అవకాశం ఉందని వాతావరణ కేంద్రం హెచ్చరించింది. ప్రజలు అప్రమత్తంగా ఉండాలని అధికారులు సూచించారు.