ముంబైలో మొహర్రం ఊరేగింపులో విషమాత్రలు పంచే యత్నాన్ని పోలీసులు భగ్నం చేసి, పూణే వ్యాపారిని అరెస్టు

దక్షిణ ముంబైలోని డోంగ్రీ ప్రాంతంలో మొహర్రం ఊరేగింపు సమయంలో వేలాది మందికి విషమాత్రలు పంచే ప్రమాదకర యత్నాన్ని ముంబై పోలీసులు భగ్నం చేశారు.

పూణేకు చెందిన 39 ఏళ్ల పెయింట్ వ్యాపారి ఫయాజ్ ప్రేమ్జీ ఈ పథకం రచించాడు. అతడు డోంగ్రీలోని ఓ అతిథి గృహంలో దిగి, ఊరేగింపులో పాల్గొనేవారికి పెయిన్ కిల్లర్స్ లేదా ఇమ్యూనిటీ బూస్టర్లుగా చెప్పి క్యాప్సూల్స్ ఇవ్వాలనుకున్నాడు.

ఈ క్యాప్సూల్స్ లోపల ప్రాణాంతక విషం ఉంది. నిందితుడు ఒక వ్యక్తికి టెస్ట్‌గా ఇచ్చిన క్యాప్సూల్ తీసుకున్న తరువాత ఆ వ్యక్తికి తీవ్రమైన కడుపునొప్పి, వాంతులు రావడంతో, అతడు పోలీసులకు ఫిర్యాదు చేశాడు.

సమాచారం అందుకున్న పోలీసులు అతిథి గృహంపై దాడి చేసి ఫయాజ్‌ను అదుపులోకి తీసుకున్నారు. గదిలో 14,900 విష క్యాప్సూల్స్ స్వాధీనం చేసుకున్నారు.

విచారణలో నిందితుడు గత ఏడాదిలోనే ఇరాన్, ఇరాక్ దేశాలకు 19 సార్లు ప్రయాణించినట్లు తేలింది. అతని తల్లి, సోదరి ఇరాన్‌లో నివసిస్తున్నారు. ఈ విష ప్రయోగం వెనుక అంతర్జాతీయ ఉగ్రవాద సంబంధాలు ఉన్నాయా లేక వ్యక్తిగత విద్వేషమా అనే కోణంలో ముంబై క్రైమ్ బ్రాంచ్ విచారణ చేస్తోంది.

నిందితుడిపై హత్యాయత్నం, విష ప్రయోగం తదితర సెక్షన్ల కింద కేసు నమోదు చేశారు.