ముంబైలో భారీ వర్షాలు: అంధేరీ సబ్వే మూసివేత, రోడ్లు జలమయం; ఆరెంజ్ అలర్ట్

ముంబై నగరంలో సోమవారం అర్ధరాత్రి కురిసిన భారీ వర్షాలకు రోడ్లు జలమయమయ్యాయి. అంధేరీ సబ్వే పూర్తిగా నీటిలో మునగడంతో జాగ్రత్త చర్యగా తెల్లవారుజామున 1:46 గంటలకు దానిని ట్రాఫిక్‌కు మూసివేశారు. రద్దీ సమయానికి ముందే వాన తగ్గడం, పక్కనే ఉన్న డ్రైనేజీ నుంచి నీరు రావడం ఆగిపోవడంతో ఉదయం 5 గంటలకు సబ్వేను తిరిగి తెరిచారు. ఐతే లోతట్టు ప్రాంతాల్లో ఇప్పటికీ నీరు నిలిచి ఉంది. వాతావరణ శాఖ నగరానికి ఆరెంజ్ అలర్ట్ జారీ చేసింది. ఉరుములు, మెరుపులతో పాటు గంటకు 30 నుంచి 40 కిలోమీటర్ల వేగంతో ఈదురుగాలులు వీస్తాయని హెచ్చరించింది. స్థానిక రైళ్ల సర్వీసులకు ఇప్పటివరకు అంతరాయం కలగలేదు. గత వారం వెస్ట్రన్ రైల్వేలో సాంకేతిక సమస్య తలెత్తినా దాన్ని అధిగమించారు. వర్షం ప్రభావంపై అధికారులు నిఘా పెట్టారు. ప్రతి ఏడాది రుతుపవనాలు మొదలైన వెంటనే ముంబైలో ఇదే పరిస్థితి తలెత్తుతోంది. ప్రభుత్వాలు మారినా లోతట్టు ప్రాంతాలు, హాట్‌స్పాట్‌లు మాత్రం చిన్న వర్షానికే నీటిలో మునుగుతున్నాయి. సరైన ముందస్తు ప్రణాళికలు, సన్నద్ధత లేకపోవడమే కారణమని స్థానికులు ఆగ్రహం వ్యక్తం చేస్తున్నారు.