సాయం చేసిన వారిని మర్చిపోవద్దు: పద్మశ్రీ మురళీమోహన్

పద్మశ్రీ అవార్డు గ్రహీత, నటుడు, వ్యాపారవేత్త మురళీమోహన్ తన జీవితంలో సాయం చేసిన వ్యక్తుల గురించి భావోద్వేగంగా మాట్లాడారు. ఒక కార్యక్రమంలో ఆయన తన బిజినెస్ ప్రారంభం, సినీ రంగ ప్రవేశం గురించి వివరించారు.

50 ఏళ్ల కిందట ఇంటర్మీడియట్ వరకు చదివిన మురళీమోహన్ వ్యాపారం చేయాలనుకున్నారు. ఆ సమయంలో ఏలూరుకు చెందిన కిసాన్ ఇంజనీరింగ్ కంపెనీ యాజమాన్యం విజయవాడలో బ్రాంచ్ ప్రారంభించాలనుకుంది. గుత్తా మాణిక్యాలరావు ఆయనకు నెలకు రూ.100 జీతం, సంవత్సరానికి 15 శాతం లాభాల వాటాతో ఉద్యోగం ఇచ్చారు.

తర్వాత ఆ కంపెనీలో భాగస్వామ్యం ఇవ్వాలనుకున్న మాణిక్యాలరావు, మురళీమోహన్‌కు వారం రోజుల గడువు ఇచ్చారు. డబ్బులు లేకపోవడంతో ఆయన సతమతమైన సమయంలో, ఆయన భార్య తనకు పుట్టింటి నుంచి వచ్చిన 5 ఎకరాల పొలం అమ్మి ఆ మొత్తాన్ని ఇచ్చారు. దాంతో మురళీమోహన్ కంపెనీలో 50 శాతం షేర్‌తో భాగస్వామి అయ్యారు.

నాటకాలపై మక్కువతో నటిస్తున్న మురళీమోహన్‌కు క్రాంతికుమార్, బాపిరెడ్డి తదితరులు సినిమాల్లోకి రమ్మని ప్రోత్సహించారు. ఆ తర్వాత క్రాంతికుమార్ మద్రాసుకు తీసుకెళ్లి మేకప్ టెస్ట్, స్టిల్ ఫొటోలు తీయించగా, నిర్మాత అట్లూరి పూర్ణచంద్రరావు ఆ ఫొటోలు చూసి తన సినిమాలో అవకాశం ఇచ్చారు. జీవితంలో సాయం చేసిన వారిని ఎప్పుడూ మర్చిపోరాదని మురళీమోహన్ ఈ సందర్భంగా చెప్పారు.