పద్మశ్రీ పొందిన నటుడు మురళీ మోహన్‌కు NARETCO ఆధ్వర్యంలో సన్మానం

నటుడు మురళీ మోహన్ పద్మశ్రీ అవార్డు పొందిన నేపథ్యంలో నేషనల్ రియల్ ఎస్టేట్ డెవలప్మెంట్ కౌన్సిల్ (NARETCO) తెలంగాణ ఆయనను సన్మానించింది. హైదరాబాద్ లోని హైటెక్స్ లో 'అభినందోత్సవం' పేరిట ఈ కార్యక్రమం జరిగింది.

తెలంగాణ అసెంబ్లీ స్పీకర్ గడ్డం ప్రసాద్ కుమార్ ముఖ్య అతిథిగా పాల్గొన్నారు. ఆయన మాట్లాడుతూ మురళీ మోహన్ జీవితం సినిమా, రాజకీయాలు, వ్యాపారం, ప్రజాసేవల్లో కష్టాన్ని, క్రమశిక్షణను చూపిస్తుందని అన్నారు. ఇది ఎదగాలనుకునే ప్రతి వ్యక్తికి పాఠంగా నిలుస్తుందని తెలిపారు. ఈ కార్యక్రమంలో ఎమ్మెల్సీ భాను ప్రసాద్ రావు, NARETCO తెలంగాణ అధ్యక్షుడు శ్రీధర్ రెడ్డి, ఉపాధ్యక్షుడు గోపాలకృష్ణ తదితరులు పాల్గొన్నారు.

మురళీ మోహన్ తన ప్రసంగంలో నమ్ముకున్న సిద్ధాంతం, క్రమశిక్షణతో ముందుకు సాగడం వల్లే సినిమా రంగం, వ్యాపారంలో రాణించగలిగానని చెప్పారు. 1995లో ప్రారంభమైన NARETCO తెలంగాణ నేడు 350 మందికి పైగా ప్రముఖ బిల్డర్లు, డెవలపర్ల వేదికగా ఎదిగిందని, నిర్మాణ రంగ అభివృద్ధికి ప్రభుత్వంతో కలిసి పని చేస్తున్నామని వివరించారు. కస్టమర్ల నమ్మకాన్ని మించి సేవలు అందించాలనే ఆలోచనతో వ్యాపారం మొదలు పెట్టి విజయవంతం చేశామని చెప్పారు.