తన సినీ ప్రవేశానికి కారణమైన అట్లూరి పూర్ణచంద్రరావును స్మరించుకున్న మురళీ మోహన్

వెటరన్ నటుడు మురళీ మోహన్ తన సినీ జీవితం మొదలైన తీరును పంచుకున్నారు. తనకు తొలి అవకాశం ఇచ్చిన నిర్మాత అట్లూరి పూర్ణచంద్రరావును ఆయన గుర్తు చేసుకున్నారు.

మురళీ మోహన్ మాట్లాడుతూ, తాను వ్యాపారం చేస్తూనే నాటకాలపై ఆసక్తితో ఉండేవాడినని చెప్పారు. క్రాంతి కుమార్, హనుమాన్ ప్రసాద్ వంటి స్నేహితులు సినిమాల్లోకి రమ్మని ప్రోత్సహించారు. ఒకరోజు మద్రాసు వెళ్లి మేకప్ టెస్ట్, ఫోటోలు తీయించారు. ఆ ఫోటోలను చూసిన నిర్మాత అట్లూరి పూర్ణచంద్రరావు వెంటనే తన సినిమాలో హీరోగా ఎంపిక చేశారు.

"ఆ సినిమాకు అప్పటికే గిరిబాబును హీరోగా సెలక్ట్ చేశామని, కానీ నన్ను చూశాక నేనే హీరోగా కావాలని అనిపించిందని ఆయన చెప్పారు. గిరిబాబు ఈ విషయంలో ఎలాంటి అభ్యంతరం చెప్పకుండా విలన్ రోల్ చేశారు. ఆయన స్నేహం ఇప్పటికీ అలాగే ఉంది" అని మురళీ మోహన్ తెలిపారు.

1973లో విడుదలైన 'జగమే మాయ' చిత్రం మురళీ మోహన్‌కు హీరోగా మొదటి సినిమా. అట్లూరి పూర్ణచంద్రరావు 13 భాషల్లో 87 చిత్రాలు నిర్మించిన పెద్ద నిర్మాత. ఈ చిత్రం యావరేజ్‌గా ఆడింది. ఆ తర్వాత దాసరి దర్శకత్వంలో 'తిరుపతి' సినిమా చేశారు.