విజయవాడలో సాయి కృష్ణ మిస్సింగ్ కేసు: సీఐ నాగరాజుపై హత్య కేసు నమోదు

విజయవాడ కృష్ణలంకకు చెందిన సాయి కృష్ణ అనే వ్యక్తి కనిపించకుండా పోయిన కేసులో సీఐ నాగరాజుపై హత్య కేసు నమోదు చేశారు. సాయి కృష్ణ తల్లి ఇచ్చిన ఫిర్యాదు మేరకు ఈ కేసు నమోదైంది.

సాయి కృష్ణను పోలీసులు కృష్ణలంక లాకప్‌లో ఉంచారని, సీఐ నాగరాజు తన కొడుకును చంపేస్తానని బెదిరించాడని సాయి కృష్ణ కుటుంబ సభ్యులు ఆరోపిస్తున్నారు. మిస్సింగ్ కేసును దర్యాప్తు చేస్తున్న ప్రత్యేక బృందం ఇప్పటికే 20 మందికి పైగా పోలీసు సిబ్బందిని విచారించింది. కృష్ణలంక పోలీస్ స్టేషన్‌తో పాటు స్మశాన వాటికలోను విచారణ చేపట్టారు.

ఈ కేసును ఏపీ ప్రభుత్వం తీవ్రంగా పరిగణించింది. ఐజీ రవి ప్రకాష్ ఆధ్వర్యంలో ప్రత్యేక దర్యాప్తు బృందం (సిట్) ఏర్పాటు చేస్తూ ఉత్తర్వులు జారీ చేశారు. రాజమండ్రి ఎస్పీని ఈ కేసుకు ప్రత్యేక అధికారిగా నియమించారు. దర్యాప్తు బృందం స్వర్గపురి స్మశాన వాటికలో రికార్డులను పరిశీలించింది. రెండు రోజుల్లో నాలుగు అనాధ శవాలు వచ్చినట్లు, సిబ్బందిపై ఒత్తిడి చేసి దహన సంస్కారాలు చేయించినట్లు సమాచారం.

మరోవైపు సింగ్ నగర్‌లోని నాగరాజు ఇంటికి పోలీసులు వెళ్లారు. అక్కడ నాగరాజు అభిమానులు ఆయన అరెస్టును వ్యతిరేకిస్తూ ఆందోళన చేపట్టారు. నాగరాజుతో పాటు కేసులో ప్రమేయం ఉన్న మరికొంతమంది పోలీసు అధికారులను విచారించారు. త్వరలోనే అరెస్టులు జరిగే అవకాశం ఉన్నట్లు తెలుస్తోంది.