నల్గొండ ప్రభుత్వ పాఠశాలకు 450 సీట్లకు 4,000 దరఖాస్తులు; ప్రైవేట్ స్కూళ్లకు ధీటుగా మౌలిక వసతులు

తెలంగాణలోని నల్గొండ జిల్లా బోటగూడలోని గోమటి రెడ్డి ప్రతీక్ ప్రభుత్వ పాఠశాలలో కేవలం 450 సీట్లకు గాను ఏకంగా 4,000 దరఖాస్తులు వచ్చాయి. గత ఏడాది వరకు కేవలం 110 మంది విద్యార్థులు మాత్రమే ఉన్న ఈ పాఠశాల ఇప్పుడు అనూహ్యమైన డిమాండ్‌ను ఎదుర్కొంటోంది. స్మార్ట్ క్లాస్‌రూమ్‌లు, డిజిటల్ ల్యాబ్‌లు, విశాలమైన ప్రాంగణం వంటి సౌకర్యాలు ప్రైవేట్ స్కూళ్లతో పోల్చదగిన స్థాయిలో ఏర్పాటు కావడంతో తల్లిదండ్రులు ఆసక్తి చూపుతున్నారు. గతంలో ఈ స్కూల్‌కు సొంత భవనం లేదు. కానీ రాష్ట్ర మంత్రి కోమటి రెడ్డి వెంకట రెడ్డి తన కుమారుడు ప్రతీక్ జ్ఞాపకార్థం స్థాపించిన కోమటి రెడ్డి ప్రతీక్ ఫౌండేషన్ సాయంతో మూడంతస్తుల భవనం నిర్మించారు. స్థానిక ఒక తల్లి మాట్లాడుతూ, 'మా పిల్లలు ముందు ప్రైవేట్ స్కూల్‌లో చదివేవారు. ఫీజులు, పుస్తకాల ఖర్చు ఎక్కువైంది. ఇప్పుడు ఈ ప్రభుత్వ పాఠశాలలో కంప్యూటర్ ఎడ్యుకేషన్, అద్భుతమైన క్యాంపస్, క్రమశిక్షణ ప్రైవేట్ స్కూల్‌కు ఏమాత్రం తీసిపోదు. అందుకే అడ్మిషన్ కోసం వచ్చాం' అని తెలిపారు. గతేడాది ఈ స్కూల్ నుంచి 33 మంది పదోతరగతి విద్యార్థులు పరీక్షలు రాశారు. వారిలో 85% ఉత్తీర్ణత సాధించగా, ప్రస్తుతం మొత్తం 270 మంది విద్యార్థులు అడ్మిషన్ పొందారు. పెరిగిన దరఖాస్తుల నేపథ్యంలో అర్హతగల విద్యార్థులను ఎంపిక చేస్తామని స్కూల్ యాజమాన్యం వెల్లడించింది.