జన్మ పౌరసత్వంపై ట్రంప్ కీలక ఆదేశాలు: బర్త్ టూరిజంపై నిషేధం

వాషింగ్టన్: అమెరికా అధ్యక్షుడు డొనాల్డ్ ట్రంప్ జన్మ పౌరసత్వానికి పెద్ద దెబ్బ తగిలేలా రెండు ఎగ్జిక్యూటివ్ ఆర్డర్లపై సంతకం చేశారు. ఈ ఆదేశాల ద్వారా పుట్టుకతో పౌరసత్వం పొందే వారి సంఖ్యను తగ్గించడానికి, ‘బర్త్ టూరిజం’ అనే వివాదాస్పద పద్ధతిని నిషేధించడానికి నిబంధనలు కఠినతరం చేశారు.

మొదటి ఆదేశంలో, సుప్రీంకోర్టు ఇటీవల ఇచ్చిన తీర్పును ఆధారంగా చేసుకుని, అమెరికా పౌరసత్వానికి అనర్హులుగా పరిగణించే వ్యక్తుల నిర్వచనాన్ని విస్తరించారు. విదేశీ శత్రువులు, విదేశీ ఉగ్రవాద సంస్థల సభ్యులు, విదేశీ ప్రభుత్వాల తరఫున లాబీయింగ్ చేసే వ్యక్తులు వంటి వారు ఇకపై జన్మ పౌరసత్వానికి అర్హులు కారు. “14వ సవరణ అమెరికా అంతర్యుద్ధం ముగిసిన వెంటనే బానిసల పిల్లల కోసం తీసుకువచ్చింది, కానీ ఇప్పుడు ధనవంతులు దీన్ని వ్యాపారంగా మార్చుకున్నారు” అని ట్రంప్ విమర్శించారు.

రెండో చారిత్రాత్మక ఆదేశం బర్త్ టూరిజాన్ని నిషేధిస్తుంది. ఇకపై పర్యాటకులుగా వచ్చి, ఉద్దేశపూర్వకంగా ఇక్కడ పిల్లల్ని కని, ఆ పిల్లలకు ఆటోమేటిక్ పౌరసత్వం పొందించే మోసపూరిత వీసా దరఖాస్తులను తిరస్కరిస్తామని ప్రభుత్వం తెలిపింది. “ఇది అమెరికా వ్యవస్థపై అత్యంత ఘోరమైన దుర్వినియోగం” అని ట్రంప్ పేర్కొన్నారు. సంఘటిత ముఠాలు వేలాది మందిని ఇక్కడికి పిల్లల్ని కనడానికి తీసుకువస్తున్నాయని, వీసాలు నిరాకరించడంతో పాటు నేర చర్యలు కూడా తీసుకుంటామని అధికారులు హెచ్చరించారు.

ఈ నిర్ణయంతో జన్మ పౌరసత్వం పొందడంలో ఇప్పటివరకూ ఉన్న వెసులుబాటు చాలా వరకూ తగ్గిపోనుంది. బర్త్ టూరిజం ద్వారా లక్షలాది మంది అమెరికా పౌరసత్వం పొందుతున్నారని ట్రంప్ ఆరోపించారు. ఈ ఆదేశాలకు రాజ్యాంగ విరుద్ధం కాదని, ఇమ్మిగ్రేషన్ అండ్ నేషనాలిటీ యాక్ట్ సెక్షన్ 215ఎ కింద అధ్యక్షునికి ఈ అధికారం ఉందని ప్రభుత్వం వివరించింది.

కాగా, ఈ సందర్భంగా ట్రంప్ పాలీసిలికాన్ ఉత్పత్తికి రక్షణ కల్పించేలా మరో ఆదేశంపై సంతకం చేశారు. చైనా నుంచి వచ్చే డంపింగ్ను నిరోధించేందుకు సెక్షన్‌ 232 కింద టారిఫ్‌లు విధించారు. అలాగే చమురు ధరలు తగ్గుతున్నాయని, ఉక్రెయిన్ యుద్ధం త్వరలో ముగుస్తుందని ఆశాభావం వ్యక్తం చేశారు.