పుష్ప 2 స్టాంపీడ్ కేసు: నాంపల్లి కోర్టు సమన్లు, అల్లు అర్జున్ సోమవారం హాజరు కావాలి

పుష్ప 2 సినిమా ప్రత్యేక ప్రదర్శన సందర్భంగా జరిగిన తొక్కిసలాట కేసులో నటుడు అల్లు అర్జున్‌కు నాంపల్లి కోర్టు సమన్లు జారీ చేసింది. ఆయన సోమవారం కోర్టుకు హాజరు కావాలని ఆదేశించింది.

ఈ ఘటన 2024 డిసెంబర్ 4న హైదరాబాద్‌లోని సంధ్యా థియేటర్‌లో చోటు చేసుకుంది. అప్పుడు పుష్ప: ది రూల్ సినిమా ప్రత్యేక ప్రదర్శనకు అల్లు అర్జున్ ముందస్తు అనుమతి లేకుండా వచ్చారు. దీంతో అభిమానులు ఒక్కసారిగా ఎగబడడంతో తొక్కిసలాట జరిగింది. ఈ ప్రమాదంలో రేవతి అనే మహిళ మరణించగా, ఆమె కుమారుడు శ్రీతేజ్ గాయపడ్డాడు.

ఈ కేసులో పోలీసులు ఇప్పటివరకు 23 మందిపై చార్జిషీట్ దాఖలు చేశారు. నిందితుల జాబితాలో 11వ స్థానంలో అల్లు అర్జున్ పేరు ఉంది. కోర్టు 19 మందికి సమన్లు పంపింది. ఇంతకుముందు డిసెంబర్ 13న అల్లు అర్జున్‌ను పోలీసులు అరెస్ట్ చేసి చంచల్‌గూడ జైలుకు తరలించారు. మరుసటి రోజు బెయిల్‌పై విడుదలయ్యారు.

ఈ ఘటనపై అల్లు అర్జున్ స్పందిస్తూ, తనది ఎలాంటి తప్పులేదని, భద్రతా బాధ్యత పోలీసులు, థియేటర్ యాజమాన్యంపై ఉంటుందని అన్నారు. బాధిత కుటుంబానికి తాను ఆర్థిక సాయం అందించినట్టు తెలిపారు. ప్రస్తుతం కోర్టు సమన్లతో సోమవారం విచారణకు హాజరు కావాల్సి ఉంది.