నేడు నీట్ 2026 రీ ఎగ్జామ్: 22.79 లక్షల మంది విద్యార్థులు హాజరు

నేడు దేశవ్యాప్తంగా నీట్ 2026 రీ ఎగ్జామ్ జరుగుతోంది. మధ్యాహ్నం 2 గంటల నుంచి సాయంత్రం 5:15 వరకు పరీక్ష కొనసాగుతుంది. ఈ పరీక్షకు దేశవ్యాప్తంగా 22.79 లక్షల మంది విద్యార్థులు హాజరవుతున్నారు.

వీరిలో 13,32,928 మంది బాలురు, 9,46,815 మంది బాలికలు ఉన్నారు. దేశంలోని 551 నగరాలతో పాటు విదేశాల్లోని 14 కేంద్రాల్లో పరీక్ష నిర్వహిస్తున్నారు. తెలంగాణలో 24 పట్టణాల్లో 208 పరీక్ష కేంద్రాలు ఏర్పాటు చేశారు. రాష్ట్రం నుంచి 72 వేల మందికి పైగా విద్యార్థులు పరీక్ష రాస్తున్నారు.

ఉదయం 11 గంటలకు పరీక్ష కేంద్రాల్లోకి అనుమతి మొదలైంది. మధ్యాహ్నం 1:30 తర్వాత గేట్లు మూసివేశారు. దివ్యాంగ విద్యార్థులకు సాయంత్రం 6:20 వరకు సమయం ఇచ్చారు.

మే 3న మొదటిసారి నీట్ ప్రవేశ పరీక్ష జరిగింది. కానీ ప్రశ్న పత్రం లీక్ అయినట్లు ఆరోపణలు రావడంతో ఎన్టీఏ పరీక్షను రద్దు చేసింది. లీకేజీతో దేశవ్యాప్తంగా విద్యార్థులు, తల్లిదండ్రులు తీవ్ర నిరసన వ్యక్తం చేశారు. కొంతమంది విద్యార్థులు ఆత్మహత్య చేసుకున్నట్లు నివేదికలు వెలువడ్డాయి.

ఈ నేపథ్యంలో రీ ఎగ్జామ్‌కు కఠిన భద్రతా చర్యలు తీసుకున్నారు. సెంటర్లలో బయోమెట్రిక్ తనిఖీలు, సీసీటీవీ కెమెరాలు, వీడియోగ్రఫీ నిఘా ఏర్పాటు చేశారు. నిషేధిత వస్తువుల జాబితాను స్పష్టం చేశారు. టెలిగ్రామ్ యాప్‌ను కూడా నిషేధించారు. దేశవ్యాప్తంగా 5 వేలకు పైగా సెంటర్లలో మాక్ డ్రిల్ నిర్వహించారు. 2.5 లక్షల మంది సిబ్బంది భద్రతా విధుల్లో ఉన్నారు.