నెల్లూరు రొట్టెల పండుగ ముగింపు; రాష్ట్రాభివృద్ధి, ఎమ్మెల్యే కావాలని రొట్టెలు పట్టిన నేతలు

నెల్లూరులోని బారా షాహీద్ దర్గాలో ఐదు రోజుల పాటు జరిగిన రొట్టెల పండుగ ఇవాళ ముగిసింది. చివరి రోజు భారీ సంఖ్యలో భక్తులు తరలివచ్చారు. దేశ, విదేశాల నుంచి లక్షల మంది పాల్గొన్నట్లు అధికారులు తెలిపారు.

తెలుగు రాష్ట్రాలతో పాటు కర్ణాటక, తమిళనాడు, మధ్యప్రదేశ్, గుజరాత్ నుంచి కూడా భక్తులు వచ్చారు. స్వర్ణాల చెరువులో వారు కోరికల రొట్టెలను మార్చుకున్నారు. ప్రభుత్వం పోలీస్ బందోబస్తు, డ్రోన్, సీసీ కెమెరా పర్యవేక్షణ, వైద్య శిబిరాలు, పారిశుద్ధ్య ఏర్పాట్లు సమకూర్చింది. బోటు షికార్లు కూడా ఏర్పాటు చేశారు.

ముగింపు సభ సాయంత్రం 7 గంటలకు జరిగింది. ఈ సందర్భంగా మంత్రి నారాయణ స్వర్ణాల చెరువులో రొట్టెను అందుకుని, రాష్ట్ర అభివృద్ధి జరగాలని ఆకాంక్షించారు. ఎమ్మెల్యే కోటంరెడ్డి శ్రీధర్ రెడ్డి తన సోదరుడు గిరిధర్ రెడ్డి ఎమ్మెల్యే కావాలని కోరుతూ రొట్టెను స్వీకరించారు.

వక్ఫ్ బోర్డు ఛైర్మన్ అబ్దుల్ అజీజ్ పేద విద్యార్థులందరికీ ఉచిత విద్య అందించాలని విద్యా రొట్టెను పట్టుకున్నారు. ఐదు రోజుల పాటు ఉత్సవం ప్రశాంతంగా సాగిందని అధికారులు తెలిపారు.