నేపాల్‌లో వరదలు: 105 మంది భారతీయులు సహా 384 మంది గల్లంతు

నేపాల్‌లోని రసువా జిల్లాలో బోటే కోశీ నది ఒక్కసారిగా ఉప్పొంగడంతో 105 మంది భారతీయులతో సహా 384 మంది గల్లంతయ్యారు. టిబెట్ సరిహద్దు సమీపంలో సంభవించిన ఈ వరదలో ఇప్పటివరకు ఎనిమిది మంది చనిపోయినట్లు అధికారులు తెలిపారు. మృతుల సంఖ్య మరింత పెరిగే అవకాశం ఉందని అంచనా వేస్తున్నారు.

నేపాల్ టూరిజం బోర్డు ప్రాథమిక సమాచారం ప్రకారం 384 మంది ప్రయాణికులు గల్లంతయ్యారు. వీరిలో 291 మంది విదేశీయులు కాగా 93 మంది నేపాలీయులు. విదేశీయుల్లో 105 మంది భారతీయులు ఉన్నారు. మరో 37 మంది ఎన్ఆర్ఐలు గల్లంతైనట్లు తాజా సమాచారం.

గల్లంతైన వారిలో చాలా మంది కైలాస్ మానస సరోవర యాత్రకు వెళ్తున్నట్లు తెలుస్తోంది. కనీసం 59 మంది భారతీయులు ఈ యాత్రలో ప్రయాణిస్తున్నట్లు ట్రావెల్ ఏజెన్సీలు వెల్లడించాయి. టిబెట్‌కు వెళ్లే కీలక మార్గం, రసువాగడి సరిహద్దు క్రాసింగ్ దెబ్బతిన్నాయి.

రసువాతో పాటు నువాకోట్, దాడింగ్ జిల్లాలు తీవ్రంగా ప్రభావితమయ్యాయి. వరద కారణంగా సుమారు 430 మెగావాట్ల జల విద్యుత్ ఉత్పత్తికి అంతరాయం ఏర్పడింది. నేపాల్ ఆర్మీ, ఆర్మ్డ్ పోలీస్ ఫోర్స్, నేపాల్ పోలీస్ బృందాలు రంగంలోకి దిగాయి. హెలికాప్టర్లు, డ్రోన్లతో గల్లంతైన వారి కోసం గాలింపు చర్యలు కొనసాగుతున్నాయి.

కొన్ని ప్రాంతాల్లో వరద ఉద్ధృతి అధికంగా ఉండడంతో సహాయక చర్యలకు ఆటంకాలు ఎదురవుతున్నాయి. నదీ తీరాలకు దూరంగా ఉండాలని, సురక్షిత ప్రాంతాలకు తరలివెళ్లాలని అధికారులు సూచించారు. భారత రాయబార కార్యాలయం ఎమర్జెన్సీ హెల్ప్‌లైన్ ఏర్పాటు చేసింది.