కైలాస్ యాత్రలో 80 మంది విదేశీ యాత్రికులు గల్లంతు: సద్గురు

కైలాస్ మానస సరోవర్ యాత్రకు వెళ్లిన 80 మంది యాత్రికులు గల్లంతయ్యారని ఆధ్యాత్మిక గురువు సద్గురు వెల్లడించారు. ఈ బృందాన్ని సాగా ప్రాంతంలో తాము కలిశామని, ఆ సమయంలో వారు యాత్ర ముగించుకుని దిగి వస్తున్నారని ఆయన తెలిపారు.

గల్లంతైన వారిలో 22 మంది అమెరికా, 12 మంది కెనడా, 11 మంది ఆస్ట్రేలియా, 9 మంది యూకే, 4 మంది జర్మనీ, 3 మంది ఫ్రాన్స్, 3 మంది నేపాల్, 2 మంది నెదర్లాండ్స్, 2 మంది న్యూజిలాండ్, 2 మంది సింగపూర్, 2 మంది స్పెయిన్ జాతీయులు ఉన్నారు. ఫిన్లాండ్, హంగేరీ, ఇజ్రాయెల్, లిథువేనియా, ఫిలిప్పీన్స్, పోర్చుగల్, రష్యా, దక్షిణాఫ్రికా దేశాల నుంచి ఒక్కొక్కరు ఉన్నారు. మొత్తం 80 మందిలో 34 మంది పురుషులు, 46 మంది మహిళలు ఉన్నారు. సమీపంలోని హోటళ్లలో ఉన్న ముగ్గురు వాలంటీర్లు, ఒక డాక్టర్ కూడా ఈ బృందంలో ఉన్నట్లు ఆయన చెప్పారు. డాక్టర్ రెండు రోజుల క్రితం ఆశ్రమం నుంచి వచ్చినట్లు తెలిపారు.

అయితే వీరి గల్లంతుపై ఇంకా అధికారిక ధృవీకరణ రాలేదని సద్గురు స్పష్టం చేశారు. విధ్వంసం తీవ్రతను చూస్తే పరిస్థితి ఆందోళనకరంగా ఉందని ఆయన అన్నారు. వారం క్రితం వీసా, ఇమ్మిగ్రేషన్ ప్రక్రియ జరిగిన భవనం పూర్తిగా కొట్టుకుపోయిందని, పట్టణంలో కొంత భాగం కూడా కొట్టుకుపోయిందని ఆయన వివరించారు. ఆ ప్రాంతంలో కమ్యూనికేషన్ వ్యవస్థ పూర్తిగా నిలిచిపోయింది. దీంతో మిగతా వారి వివరాలు తెలియడం లేదని సద్గురు చెప్పారు.