నారాయణపేట జిల్లా ధన్వాడలో రూ.3 కోట్లతో బీరప్ప ఆలయ పునర్నిర్మాణం

నారాయణపేట జిల్లా ధన్వాడ గ్రామంలోని బీరప్ప ఆలయాన్ని స్థానిక కురుమ కులస్తులు రూ.3 కోట్లతో పునర్నిర్మించారు.

పూర్వీకులు నిర్మించిన ఈ ఆలయం శిథిలావస్థకు చేరడంతో పునర్నిర్మాణం చేపట్టినట్టు స్థానికులు తెలిపారు. ఆలయంలో ప్రతిరోజు అభిషేకాలు నిర్వహిస్తారు. ప్రతి అమావాస్యకు అన్నదానం జరుగుతుంది. శివరాత్రి, సంక్రాంతి, ఉగాది పండుగలను ప్రత్యేకంగా జరుపుతారు.

ఈ ఆలయ నిర్మాణం కోసం తమిళనాడు, ఆంధ్రప్రదేశ్ నుంచి శిల్పకళా నిపుణులను తీసుకొచ్చినట్టు స్థానికులు చెప్పారు. యాదగిరిగుట్ట లక్ష్మీ నరసింహస్వామి ఆలయం స్ఫూర్తిగా నిర్మాణం చేశారు. గుంటూరు జిల్లా కోటప్పకొండ నుంచి రాయిని తెప్పించారు. జైపూర్ నుంచి విగ్రహం, తిరుపతి నుంచి నంది, ఏనుగులు, ధ్వజస్తంభం తెప్పించారు.

సుమారు 85 గ్రామాలకు చెందిన కుటుంబాలు ఈ ఆలయానికి సంబంధించి ఉన్నాయని స్థానికులు తెలిపారు. కర్ణాటక, ఆంధ్రప్రదేశ్, విదేశాల్లో స్థిరపడిన కుటుంబాలు కూడా ఐదేళ్లకు ఒకసారి జరిగే బండారు కార్యక్రమానికి ధన్వాడకు వస్తారు.

ఆలయ ప్రారంభోత్సవం, ప్రతిష్టాపన వేడుకలు ఈ నెల 30వ తేదీ వరకు నిర్వహించనున్నారు. ప్రతి ఐదేళ్లకు ఒకసారి బండారు పండుగ నిర్వహిస్తామని స్థానికులు తెలిపారు.