పాలకొల్లులో కళాకారులకు సర్టిఫికెట్లు అందజేసిన మంత్రి నిమ్మల రామానాయుడు

పశ్చిమ గోదావరి జిల్లా పాలకొల్లులోని అల్లూరి సీతారామ రాజు నేషనల్ ఫిల్మ్ ఇన్స్టిట్యూట్ లో శిక్షణ పూర్తి చేసుకున్న కళాకారులకు మంత్రి నిమ్మల రామానాయుడు సర్టిఫికెట్లు అందజేశారు.

లయన్స్ కమ్యూనిటీ హాల్ లో నిర్వహించిన ఈ కార్యక్రమంలో మాజీ ఎంపీ కనుమూరి బాపిరాజు, దర్శకుడు కురసాల కళ్యాణ కృష్ణ, నటి దివ్యవాణి తదితరులు పాల్గొన్నారు. ఇదే సందర్భంగా 'పాడుతా తీయగా' సినీ పాటల పోటీల విజేతలకు బహుమతులు, ప్రశంసా పత్రాలు కూడా ప్రధానం చేశారు.

ఈ సందర్భంగా మంత్రి మాట్లాడుతూ, పాలకొల్లు సినీ రంగానికి ఎంతో మంది ప్రతిభావంతులను అందించిందని తెలిపారు. తెలుగు సినీ చరిత్రలో తెనాలి, పాలకొల్లు రెండు పట్టణాలు ముఖ్యమైనవని ఆయన పేర్కొన్నారు. కళాకారులను ప్రోత్సహించడం సమాజ అభివృద్ధికి ఎంతో అవసరమని అన్నారు.

ఈ కార్యక్రమంలో నటి దివ్యవాణి 'జోల పాట' ఆలపించి, ప్రముఖ దర్శకుడు బాపును స్మరించుకున్నారు. 'పెళ్లి పుస్తకం' చిత్రంలోని ఒక పాటను గురించి ఆమె తన అనుభవాలను పంచుకున్నారు. పట్టుదలగా ప్రయత్నిస్తూ ఉంటే కళాకారుల్లో భవిష్యత్తులో గొప్ప ప్రతిభ బయటపడుతుందని ఆమె యువ కళాకారులకు సూచించారు.