నిర్జల ఏకాదశి: నీటికుండ దానంతో పుణ్యఫలం, శ్లోకం వివరాలు

జ్యేష్ఠ మాసం శుక్ల పక్షంలో వచ్చే ఏకాదశిని నిర్జల ఏకాదశిగా పిలుస్తారు. ఈ ఒక్క రోజు నీళ్లు కూడా తీసుకోకుండా ఉపవాసం చేస్తే సంవత్సరంలోని 24 ఏకాదశుల వ్రత ఫలం లభిస్తుందని స్కాంద పురాణంలో చెప్పబడింది.

పంచపాండవుల్లో భీముడు వ్యాస మహర్షి ఆదేశం మేరకు ఈ నిర్జల ఉపవాసం ఆచరించాడని పౌరాణిక గ్రంథాలు వివరిస్తున్నాయి. అయితే నీళ్లు లేకుండా ఉపవాసం ఉండలేని వారు పాలు, పండ్లు తీసుకుంటూ కూడా ఉపవాసం చేయవచ్చని, అలా చేసినా పూర్తి ఫలితం దక్కుతుందని స్కాంద పురాణం కేదార ఖండం పేర్కొంటోంది.

ఉపవాసం చేయలేనివారికి ప్రత్యామ్నాయంగా దానాలు సూచించబడ్డాయి. వీటిలో నీటికుండ (ఉదకుంభ) దానం ముఖ్యమైనది. దేవాలయంలో లేదా ఇంటి వద్ద పండితుడికి నీటికుండ దానం ఇవ్వడం వల్ల మానసిక అశాంతి తొలగి, పాపాలు నశించి, ఏకాదశి వ్రత ఫలితం లభిస్తుందని భక్తుల విశ్వాసం.

దానం చేసే సమయంలో 'దేవదేవ హృషికేశ సంసారార్ణవ తారక ఉదకుంభ ప్రధానేన నయ పరమాం గతిం' అనే శ్లోకం చదవాలి. సంసార సాగరం నుంచి తరింపజేసే హృషికేశుడైన శ్రీ మహావిష్ణువు అనుగ్రహం కోసం ఈ కుండను దానం ఇస్తున్నానని ఈ శ్లోకానికి అర్థం. ఇదే కాకుండా గొడుగు, చెప్పులు, బెల్లం, పెసరపప్పు వంటి దానాలు కూడా జాతక దోషాల తీవ్రతను తగ్గించి శుభ ఫలితాలను ఇస్తాయని పేర్కొన్నారు.