నితిన్ నబీన్ తెలంగాణ పర్యటన నేటితో ముగింపు, ఘట్కేసరిలో బీజేపీ సమావేశం

బీజేపీ జాతీయ అధ్యక్షుడు నితిన్ నబీన్ తెలంగాణ పర్యటన నేటితో ముగుస్తుంది. పర్యటన చివరి రోజు ఆయన ఘట్కేసరిలో జరిగే రాష్ట్ర కార్యవర్గ సమావేశానికి హాజరవుతారు.

ఈ సమావేశానికి రాష్ట్ర బీజేపీ అధ్యక్షుడు రామచంద్రరావు అధ్యక్షత వహిస్తారు. నబీన్ ముఖ్య అతిథిగా పాల్గొని పార్టీ బలోపేతంపై దిశానిర్దేశం చేయనున్నారు. అనంతరం మధ్యాహ్నం ఢిల్లీకి తిరిగి వెళతారు.

నిన్న రాత్రి హోటల్ హరితా ప్లాజాలో జరిగిన బీజేపీ ఆఫీస్ బేరర్స్ సమావేశంలో ఆయన పాల్గొన్నారు. ఈ సమావేశంలో సునీల్ బన్సల్, కిషన్ రెడ్డి, పలువురు పదాధికారులు హాజరయ్యారు. గత ఆరు నెలల పనితీరు సమీక్షించిన నబీన్, పనితీరు సరిగా లేని వారిపై అసంతృప్తి వ్యక్తం చేశారు. పనితీరు మెరుగుపరుచుకోకపోతే పదవులు వదులుకోవాలని సూచించారు. గ్రూప్ రాజకీయాలు చేయవద్దన్నారు.

తెలంగాణలో బీజేపీ అధికారంలోకి వచ్చేందుకు అవకాశాలు ఉన్నాయని, వాటిని సద్వినియోగం చేసుకోవాలని నబీన్ పార్టీ నేతలకు సూచించారు.