ఎన్టీఆర్ జిల్లా రహదారులపై రోడ్డు ప్రమాదాలు: 28 బ్లాక్ స్పాట్స్ గుర్తింపు, అధికారుల చర్యలు

ఎన్టీఆర్ జిల్లాలో రహదారులు రక్తమోడుతున్నాయి. విజయవాడ కేంద్రంగా హైదరాబాద్, చెన్నై, కోల్కత్తాలను కలిపే మూడు జాతీయ రహదారులపై రాత్రింబవళ్ళు భారీ వాహనాలు తిరుగుతుండటంతో ప్రమాదాల సంఖ్య నానాటికీ పెరుగుతోంది. వేగం, నిర్లక్ష్యం, రోడ్డు నిర్మాణ లోపాలు, ప్రమాదకర మలుపులు వంటి కారణాల వల్ల నిండు ప్రాణాలు బలవుతున్నాయి.

ఎన్టీఆర్ జిల్లా పోలీసులు మరియు జిల్లా అధికారులు కలిసి జిల్లాలో మొత్తం 28 బ్లాక్ స్పాట్స్ గుర్తించారు. విజయవాడ–హైదరాబాద్ జాతీయ రహదారిపై జగ్గయ్యపేట నుండి కంచికచర్ల వరకు 13 బ్లాక్ స్పాట్స్ గుర్తించారు. గొల్లపూడి సమీపంలోని వై జంక్షన్, కనకదుర్గమ్మ వారధి సమీపంలోని చెన్నై–విజయవాడ జాతీయ రహదారి, బెంజ్ సర్కిల్ వద్ద మూడు జాతీయ రహదారుల సంగమ స్థానం అత్యంత ప్రమాదకరమైన ప్రాంతాలుగా గుర్తించారు.

నందిగామ DSP చలసాని శ్రీనివాస్ మాట్లాడుతూ, రోడ్డు ఇంజనీరింగ్ లోపాలున్న చోట్ల సవరణలు చేశామని, అతివేగం వల్ల ప్రమాదాలు జరిగే చోట్ల జిగ్జాగ్ బ్యారికేడ్లు ఏర్పాటు చేశామని తెలిపారు. MIC కళాశాల సమీపంలో డివైడర్ కటింగ్ దగ్గర కోన్లు పెట్టి వాహన వేగం తగ్గించడంతో అక్కడ ప్రమాదాలు నిలిచాయని పేర్కొన్నారు.

సాయంత్రం వేళల్లో హెల్మెట్ లేకుండా టూ వీలర్లు నడపడం వల్ల మరణాలు సంభవిస్తున్నాయని, తెల్లవారుజామున రెండు నుండి ఐదు గంటల మధ్య నిద్రమత్తులో వాహనాలు ప్రమాదాలకు గురవుతున్నాయని DSP వివరించారు. వాష్ అండ్ గ్రో కార్యక్రమం ద్వారా రాత్రిపూట డ్రైవర్లను అప్రమత్తంగా ఉంచే చర్యలు తీసుకుంటున్నారు. సెల్ ఫోన్ వాడుతూ వాహనం నడిపే వారిపై భారీ జరిమానాలు విధిస్తున్నారు. హెల్మెట్ ధారణపై అవగాహన సదస్సులు నిర్వహిస్తున్నారు. ప్రమాదాలు జరగకముందే నివారించే దిశగా అధికారులు కార్యాచరణ ప్రణాళిక రూపొందించారు.