ఉస్మానియా ఆస్పత్రిలో అరుదైన శస్త్రచికిత్స: ఒకే రోగికి ఐదు అవయవాల మార్పిడి

హైదరాబాద్ ఉస్మానియా ఆస్పత్రి వైద్యులు అరుదైన శస్త్రచికిత్స విజయవంతంగా చేశారు. సిరిసిల్లకు చెందిన ఓ యువ ఇంజనీర్‌కు ఒకే ఆపరేషన్‌లో ఐదు అవయవాలు మార్పిడి చేశారు. వాటిలో జీర్ణాశయం, డియోడెనం, ప్యాంక్రియాస్, చిన్నపేగు, పెద్దపేగు ఉన్నాయి.

ఈ క్లిష్టమైన చికిత్స దాదాపు 36 గంటల పాటు కొనసాగింది. దేశంలోనే తొలి మల్టీ-విసెరల్ ట్రాన్స్‌ప్లాంట్ ఇదే అని వైద్యులు తెలిపారు. ఈ సంక్లిష్ట ప్రక్రియలో శస్త్రచికిత్సకులతో పాటు అనస్థీషియా, క్రిటికల్ కేర్ బృందాలు పాల్గొన్నాయి.

రాష్ట్ర ఆరోగ్య శాఖ మంత్రి దామోదర్ రాజనరసింహ ఈ విజయాన్ని ప్రశంసించారు. సర్జరీ చేసిన వైద్య బృందాన్ని, నర్సింగ్, ఇతర సిబ్బందిని ప్రత్యేకంగా అభినందించారు. ప్రభుత్వ ఆస్పత్రుల్లో అంతర్జాతీయ స్థాయి చికిత్స అందుతోందనడానికి ఇది నిదర్శనమని మంత్రి తెలిపారు. తెలంగాణ ప్రభుత్వం వైద్య రంగాన్ని మరింత బలోపేతం చేస్తూ అత్యాధునిక సేవలను ప్రజలకు అందుబాటులోకి తెస్తోందని ఆయన చెప్పారు.