ఉస్మానియా యూనివర్సిటీలో తీజ్ వేడుకలు; రాష్ట్ర పండుగగా గుర్తించాలని విజ్ఞప్తి

హైదరాబాద్‌లోని ఉస్మానియా యూనివర్సిటీలో తీజ్ పండుగ వేడుకలు జరిగాయి. ఓయూ తీజ్ ఉత్సవ కమిటీ ఆధ్వర్యంలో ఈ కార్యక్రమం నిర్వహించారు.

విద్యార్థులు, పరిశోధకులు, బంజారా సంఘాల ప్రతినిధులు పెద్ద సంఖ్యలో పాల్గొన్నారు. సంప్రదాయ దుస్తులు ధరించిన మహిళలు, యువత తీజ్ బుట్టలతో ఊరేగింపులో పాల్గొన్నారు.

తీజ్ పండుగ ప్రత్యేకతలను వివరిస్తూ సాంస్కృతిక కార్యక్రమాలు నిర్వహించారు. అనంతరం సంప్రదాయబద్ధంగా తీజ్ బుట్టలను నిమజ్జనం చేశారు. ఈ వేడుకలు 15వ తేదీ నుంచి 23వ తేదీ వరకు కొనసాగాయి.

బంజారా సమాజం జరుపుకునే తీజ్ ఒక ప్రకృతి పండుగ. ఈ పండుగలో మహిళలు తొమ్మిది రోజులు ఉపవాసం ఉంటారు. మంచి పంటలు, కుటుంబ ఆరోగ్యం కోసం ప్రార్థనలు చేస్తారు.

గత 13 సంవత్సరాలుగా ఉస్మానియా యూనివర్సిటీలో ఈ వేడుకలు నిర్వహిస్తున్నట్లు నిర్వాహకులు తెలిపారు. తెలంగాణలో సుమారు 50 లక్షల మంది బంజారా ప్రజలు ఈ పండుగ జరుపుకుంటున్నారని కమిటీ పేర్కొంది. తీజ్‌ను రాష్ట్ర పండుగగా గుర్తించాలని రాష్ట్ర ప్రభుత్వానికి విజ్ఞప్తి చేసింది.