ఇస్రోలో 100 మందికి పైగా శాస్త్రవేత్తల రాజీనామాలు

ఇండియన్ స్పేస్ రీసెర్చ్ ఆర్గనైజేషన్ (ISRO) లో 100 మందికి పైగా సీనియర్ శాస్త్రవేత్తలు, టెక్నికల్ సిబ్బంది రాజీనామా చేసినట్టు వార్తలు వస్తున్నాయి. వీరు ప్రధానంగా బెంగళూరులోని యుఆర్ రావ్ శాటిలైట్ సెంటర్, తిరువనంతపురంలోని విక్రమ్ సారాభాయ్ స్పేస్ సెంటర్ నుంచి రాజీనామా చేశారు.

గగనయాన్, మంగళయాన్-2 వంటి కీలక ప్రాజెక్టుల్లో పనిచేస్తున్న సీనియర్ సైంటిస్ట్ విక్టర్ జోసెఫ్ కూడా ఇస్రోను వీడినట్టు సమాచారం. ఈ రాజీనామాలకు ప్రధాన కారణం ప్రైవేట్ స్పేస్ స్టార్టప్‌ల నుంచి వస్తున్న అవకాశాలు. 2020లో కేంద్రం స్పేస్ సెక్టార్‌ను ప్రైవేట్‌కు తెరవడంతో దేశంలో 400కు పైగా స్పేస్ స్టార్టప్‌లు వచ్చాయి. ఈ సంస్థలు శాస్త్రవేత్తలకు అధిక జీతాలు, పరిశోధన స్వేచ్ఛ కల్పిస్తున్నాయి.

అనుభవజ్ఞులైన సైంటిస్టులు బయటకు వెళ్లడం వల్ల ఇస్రో ప్రయోగాలపై ప్రభావం కనిపించింది. ఇటీవల PSLV C62, C61 ప్రయోగాలు ఆశించిన స్థాయిలో విజయవంతం కాలేదు. దీంతో కేంద్రం ఇస్రో అనుబంధ సంస్థలకు కీలక ప్రాజెక్టుల్లో పనిచేసే వారి రాజీనామాలను సులువుగా ఆమోదించవద్దని ఆదేశాలు జారీ చేసింది.

ఈ విషయంపై కేంద్ర శాస్త్ర, సాంకేతిక శాఖ మంత్రి జితేంద్ర సింగ్ స్పందించారు. ఇస్రోలో ఉద్యోగుల రాకపోకలు సాధారణమేనని, ఇది ఆందోళన చెందాల్సిన అంశం కాదని ఆయన స్పష్టం చేశారు. ఇస్రో మాజీ చైర్మన్ సోమనాథ్ మాట్లాడుతూ, గగనయాన్ మిషన్‌పై ఎలాంటి ప్రభావం ఉండదని, ఇస్రో అనేది నిరంతరం సాగే ప్రవాహం లాంటిదని అన్నారు.