SIR ప్రక్రియపై ఒవైసీ అసంతృప్తి: ‘పౌరసత్వంపై ప్రశ్నార్థకం వస్తుంది’

AIMIM అధ్యక్షుడు అసదుద్దీన్ ఒవైసీ తెలంగాణలో ప్రత్యేక సంక్షిప్త పునర్వీక్షణ (SIR) ప్రక్రియపై తీవ్ర అసంతృప్తి వ్యక్తం చేశారు. ఈ ప్రక్రియలో పేర్లు మిస్ అయితే నేరుగా పౌరసత్వంపై ప్రశ్నార్థకం ఏర్పడే ప్రమాదం ఉందని ఆయన హెచ్చరించారు. ఎన్నికల సంఘం (ECI) ఇచ్చే రెండు ఎన్యూమరేషన్ ఫారాల్లో ఏదైనా పొరపాటు జరిగితే తిరిగి ఫామ్స్ ఇవ్వరని, దీంతో ఓటరు పేరు చేరదని ఆయన వివరించారు. ముందుగా చెప్పినట్లు ముద్రిత ఫామ్స్ ఇవ్వకుండా, తాజాగా 2022 జాబితా ఆధారంగా ఓటర్లు వివరాలు రాసేలా మార్పు చేయడాన్ని ఆయన విమర్శించారు. 2002లో మ్యానువల్గా తయారైన జాబితాలో చాలా అనోమలీలు ఉన్నాయని, తల్లిదండ్రుల పేర్లు లేకపోవడం, వయస్సు వ్యత్యాసం వంటి సమస్యలతో కేవలం 8 డాక్యుమెంట్లు మాత్రమే తెలంగాణలో అందుబాటులో ఉన్నాయని ఒవైసీ తెలిపారు. ఫ్యామిలీ రిజిస్టర్, పర్మినెంట్ రెసిడెన్స్ సర్టిఫికెట్, NRC లేవని, ఆధార్ ఒంటరిగా చెల్లదని చెప్పారు. సుప్రీంకోర్టు తీర్పు ప్రకారం తుది SIR జాబితాలో పేరు లేకపోతే ఆ పేర్లను MHA కు పంపుతుందని, దాంతో పౌరసత్వంపై ప్రశ్న వస్తుందని అన్నారు. గత రెండు నెలల్లో తమ పార్టీ యాప్ ద్వారా లక్షల మందికి 2022 నాటి పేర్ల వివరాలు, మ్యాపింగ్ సాయం అందించామని చెప్పారు. ముఖ్యమంత్రి రేవంత్ రెడ్డి మరిన్ని MEE సెంటర్లు ఏర్పాటు చేయడాన్ని స్వాగతిస్తున్నానని తెలిపిన ఆయన, ప్రజలు డాక్యుమెంట్ల కోసం ఇబ్బందులు ఎదుర్కొంటున్నారని వివరించారు. ECI ముందస్తు మ్యాపింగ్ డేటాను BLA లతో షేర్ చేస్తే తప్పులు తగ్గుతాయని ఆయన డిమాండ్ చేశారు. పాస్పోర్ట్ కేవలం ప్రయాణ డాక్యుమెంట్ అనే అమిత్ షా వాదనపై స్పందిస్తూ, పాస్పోర్ట్ చట్టం ప్రకారం భారత పౌరులకు మాత్రమే పాస్పోర్ట్ ఇస్తారని, ప్రభుత్వం తనకు నచ్చిన వ్యక్తిని ‘పౌరుడివా? నిరూపించుకో’ అని ప్రశ్నించే నియంత్రణ కలిగి ఉండాలని చూస్తోందని ఒవైసీ విమర్శించారు.